Na tarde do xoves só había dous incendios de relevancia e medio día despois a Xunta informa doutros nove nun contexto de alerta por altas temperaturas e cos encoros coas reservas máis baixas da última década

Na tarde deste xoves había activos en toda Galicia só dous incendios de relevancia, en Ribadavia e Melón, con 65 e 50 hectáreas afectadas cada un. Nas horas seguintes rexistráronse por todo o país treboadas que deixaron chuvia pero tamén un importante número de raios que estarían detrás dalgúns dos incendios que se produciron a continuación e que en apenas medio día consumiron arredor de 1.300 hectáreas, nun contexto dunha vaga de calor mesmo con alerta vermella por altas temperaturas e cos encoros coas reservas de auga máis baixas da última década.

Desde 2009 a Consellería do Medio Rural só informa dos incendios que afectan a máis de 20 hectáreas, a espazos protexidos ou que poden poñer en perigo á poboación ou que. Se este xoves só cumprían eses requisitos os incendios de Ribadavia e Melón, que comezaran o luns e o martes e que aínda non se dan por controlados senón só por estabilizados, no parte das 14 horas deste venres a consellería suma outros nove incendios, todos eles activos a esa hora:

• Folgoso do Courel: Está decretada como medida preventiva a Situación 2 por risco da poboación en dous incendios nas parroquias de Seceda, con 200 hectáreas, e Vilamor, con 300 hectáreas. Nos dous casos está a traballar xa a Unidade Militar de Emerxencias. Tamén na parroquia de Vilamor hai un terceiro lume de menor entidade con 92 hectáreas afectadas.
• Quiroga: Na parroquia de Outeiro un incendio afecta a 200 hectáreas.
• A Pobra do Brollón: Na parroquia de Saa un lume queima xa 65 hectáreas e tras o parte das 14 horas a Xunta tamén informou de que se solicitara a Situación 2. O conselleiro de Medio Rural anunciou o seu desprazamento a este lume na tarde deste venres.

• Vilariño de Conso: Na parroquia de Pradoalbar queimáronse xa 40 hectáreas dentro do parque natural do Invernadeiro.
• Carballeda de Valdeorras: Na parroquia de Riodolas, salpicada polas grandes canteiras de lousa da zona, un incendio afecta a 400 hectáreas.
• Baiona: Na parroquia de Baredo un incendio supera as 40 hectáreas e aproximouse a zonas habitadas da veciña parroquia de Baíña.
• Cualedro: Na parroquia da Xironda hai tamén un lume dunhas 40 hectáreas.