MeteoGalicia e AEMET coinciden en prognosticar algunhas nubes na Mariña e a Costa da Morte
A dous días da eclipse total de sol MeteoGalicia e a Axencia Estatal de Meteoroloxía (AEMET) coinciden este luns en prognosticar ceos despexados na maior parte de Galicia e algunhas nubes na Mariña e o norte da Costa da Morte. Un prognóstico que se irá facendo máis preciso nas próximas horas.
Segundo a previsión de MeteoGalicia, o mércores Galicia quedará nunha situación intermedia entre o anticiclón situado sobre o centro de Europa e as baixas presións do Atlántico, co que o día comezará con nubes e néboas pero "co avance da mañá quedaremos cos ceos despexados en toda Galicia". Porén, "a partir de media tarde volverán entrar as nubes baixas polo norte, polo que cara á noite os concellos das comarcas de Terra de Soneira, Bergantiños, A Coruña, Ortegal e a Mariña de Lugo son as máis probables nas que o ceo se vaia cubrindo de norte a sur".
Pola súa banda, a previsión da AEMET sinala este luns que prevé "nubosidade baixa en rexións da área cantábrica e do norte de Galicia e con maior incerteza nos litorais de Galicia". A AEMET ofrece gráficos de tipo de nubes previstas, con predominancia nesas zonas das nubes baixas fronte ás altas. Canto á nubosidade total, os seus gráficos sitúan a peor situación, cunha alta probabilidade de ceo cuberto, na Mariña máis oriental, entre Foz e Ribadeo.
Alerta amarela por calor
A Xunta activa unha alerta amarela por altas temperaturas no interior de Pontevedra e a montaña de Ourense
Por outra banda, o tempo solleiro dos próximos días trae consigo unha alerta amarela por altas temperaturas activada pola Xunta para o interior de Pontevedra e a montaña de Ourense. Segundo a Xunta, o incremento producirase entre o luns e o martes e "a situación de calor continuará previsiblemente ata o venres, especialmente no interior da comunidade".
