As dúas curtas poderán verse o 25 de novembro e nos días previos en sete cineclubs galegos e mais en tres salas comerciais
Unha proxección conxunta das curtametraxes '16 de decembro' (Álvaro Gago) e 'Suc de síndria' (Irene Moray) acompañará os actos do 25-N Día Internacional da Eliminación da Violencia contra a Muller en Galicia. As dúas pezas, que tratan distintos aspectos desta problemática, poderán verse nas pantallas dos cineclubs Lumiere (Vigo), Cangas, Carballiño, Valle Inclán (Lugo), Padre Feijoo (Ourense), Os Papeiros (Chantada) e La Lanterna (Viana do Bolo), e tamén nos cines Numax (Santiago), Dúplex (Ferrol) e Minicines Central (A Estrada).
O proxecto, financiado pola Federación de Cineclubs de Galicia (FECIGA) para os seus asociados, é unha iniciativa de Elena García Román, vicepresidenta da Federación de Cineclubs e delegada da Asociación de Mulleres Cineastas e Medios Audiovisuais (CIMA). "A idea naceu despois de ver ‘16 de decembro’ no Festival de Locarno. Soñei coa posibilidade de poder proxectar este traballo no maior número posible de salas durante a campaña En Negro, buscando visibilizar non só o traballo de Álvaro, senón tamén a acción colectiva de sensibilización social contra a violencia machista", explica Elena García.
"Soñei con proxectar este traballo no maior número posible de salas durante a campaña En Negro, buscando visibilizar non só o traballo de Álvaro, senón a acción de sensibilización contra a violencia machista"
Pola súa banda, o propio Álvaro Gago destaca a "enorme ilusión" xera o proxecto. "Detrás escóndese unha forte vontade de levar ás curtametraxes ás salas de cine e ofrecer así a posibilidade de visualizar obras ás que dificilmente poderíase acceder doutro xeito e, por enriba de todo, un desexo de concienciar, sensibilizar e erradicar a violencia contra as mulleres e calquera outro tipo de violencia", di. "A loita feminista trátase tamén dunha oportunidade que temos todos nos para participar activamente na denuncia de todas as formas de opresión existentes e contribuír así a construír unha sociedade máis igualitaria, máis empática, máis amable, máis colectiva, máis humana, máis fermosa", engade.
As proxeccións comezaron xa o pasado venres 15 no Cineclube Carballiño (Auditorio Manuel María) e continúan este xoves no Clube cultural Valle Inclán de Lugo (ás 20.00 horas no Auditorio Vello Carcere). O domingo 24 realizarase no Cineclube A Lanterna de Viana do Bolo (ás 20 horas na Casa da Cultura). E xa o luns 25 nos restantes cineclubs (con entrada de balde) e nas tres salas privadas que participan na iniciativa.
As curtas
- ‘16 de decembro’ (14 minutos) é unha curtametraxe do director vigués Álvaro Gago, estreada este ano no prestixioso festival suízo de Locarno, cun percorrido posterior que inclúe a SEMINCI de Valladolid, o AFI Fest de Os Ánxeles ou o Gouna Film Festival de Exipto. A peza recibiu xa 11 premios en distintos certames, entre eles o Festival Internacional de Cine Curtocircuíto de Compostela. Na curta, Lucía, de vinte e cinco anos, sae de adestrar a balonmán e vai buscar ao seu irmán en moto baixo as luces dunha cidade que cre coñecer.
- ‘Suc de Síndria’ (22 minutos) está nomeada aos EFA (European Film Awards) e estreouse na 69 edición da Berlinale onde comezou unha xira chea de éxitos que a levou a exhibirse en festivais tan importantes coma Toronto, Chicago, Londres (BFI), Melbourne ou BAFICI (Bos Aires). Na curta, Bárbara e Pol vanse uns días de vacacións. Co apoio de Pol, no medio da natureza, entre bágoas e risas, Bárbara aprende a soltarse, sandar vellas feridas e redefinir a súa sexualidade.
