O Maré contará cunha revisión do Zeca Afonso da man de Nacho Muñoz, Faia Díaz e LAR Legido, a entrega dos premios aRi[t]mar, e unha gala de encontro galaico-portugués dirixida por Uxía
Unha nova etapa do Cantos na Maré lévao a transformarse no Festival Maré en Santiago de Compostela tras 15 anos en Pontevedra. O certame de música e artes atlánticas inaugurouse este xoves coas actuacións do angoleño Toty Sa´Med e a galega Ugia Pedreira no Hotel NH Collection, onde se desenvolverán todas as actividades ata a noite do sábado, día no que o festival acollerá a gala dos Premios aRi[t]mar da música e a poesía galego-portuguesas.
Na súa segunda xornada, este venres, o Maré contará coa brasileira LaBaq ás 19:30 horas e, a continuación, ás 21:00 horas, Nacho Muñoz, Faia Díaz e LAR Legido achegarán a súa revisión do repertorio do Zeca Afonso. As entradas pódense adquirir na web do festival.
A galega Uxía, directora artística da Gala cantosnamaré, asegura que o Maré chega a Compostela "coa ambición de ser un acontecemento global, transversal, profesional, un punto de encontro para que os músicos, os poetas, os letristas... todos os creadores implicados na fala galego-portuguesa intercambien experiencias e coñecementos, se enriquezan mutuamente e poidan trasladarlles ás nosas sociedades o perto que estamos os uns dos outros".
Na Gala cantosnamaré, que terá lugar este sábado a partir das 19:30 horas, o público poderá desfrutar dun concerto de António Zambujo e Sabela (gañadores dos premios aRi[t]mar ao mellor tema musical publicado en Portugal e Galiza), e das actuacións de Miguel Araújo, Faia e Toty Sa´Med.
Os Premios da música e a poesía galego-portuguesas aRi[t]mar, que se entregarán este sábado ás 12:30 horas, van distinguir aos músicos António Zambujo e Sabela, aos poetas Carlos da Aira (Galicia) e Raquel Lima (Portugal) e á ex directora xeral da Comunidade dos Países de Lingua Portuguesa (CPLP) e antiga Ministra de Comercio e Turismo de Cabo Verde, Georgina Benrós de Mello.
O director da Escola Oficial de Idiomas de Santiago de Compostela, Gonzalo Constenla, salientou na presentación do certame no Porto que "o proxecto aRi[t]mar Galiza e Portugal pretende celebrar a irmandade linguística luso-galaica a través da popularización da música e da poesía portuguesas en Galiza, así como destas artes galegas en Portugal, especialmente no norte do país, e en todos os países de lingua portuguesa". "E facémolo a través deste festival, aberto ao público, pero tamén coa utilización didáctico-pedagóxica da música e da poesía nas nosas aulas, cunha abordaxe innovadora e motivadora no ensino e na aprendizaxe de linguas", engadiu.
A cantautora Ugia Pedreira presentou este xoves un espectáculo inédito de creación propia, A Pedreira, sete anos despois da súa despedida dos inesquecibles Marful, que esgotou as entradas, composto por "un ramo de cancións, eu chámolles asilvestradas, algunhas compostas durante o confinamento e outras creadas durante estes sete anos".
"Para min é moi importante todo o que ten que ver coa escénica, por iso a posta en escena desas cancións tamén xoga un papel moi importante. Eu vexo o escenario como a miña casa de bonecas de xogo, son moi feliz tratando todos os puntos cardinais que hai ao redor do palco", debullou.
O Maré, tamén na rede
Unha novidade nestes tempos de pandemia é a sección 'marétv', que a través da plataforma de livestreaming Tolemias.tv permitirá seguir en directo todos os concertos do festiva, así como acceder de xeito gratuíto ata o día 26 a máis de 20 horas de actuacións de edicións anteriores do Cantos na Maré.
Co mesmo espírito de sumar e compartir os valores e os talentos dos territorios da fala galego-portuguesa, o Maré emerxe convertido agora nun océano aínda máis amplo onde desembocan ríos e afluentes con novas correntes tan imprescindibles coma imparables.
