"Cada conto, cando é verdadeiro, arrecende como unha flor, abrindo camiños no ar para aqueles que prenden o sono con medo", asegura Soledad Felloza, directora do Festival Atlántica, en marcha ata o 6 de xullo con 51 artistas que falan galego, portugués e castelán e 27 sedes distintas

O Festival Atlántica, o punto de encontro para voces e historias de perfil atlanticista dende 2013, está en marcha ata o 6 de xullo con 51 artistas que falan galego, portugués e castelán e 27 sedes distintas. “Din que quen non vai a Santo André de Teixido de vivo vai de morto. Porque hai promesas que nos atan, como fíos invisibles vencellados á terra, á memoria, ao que fomos e ao que devecemos por ser”, conta a súa directora, Soledad Felloza. Por iso nesta décimo terceira edición escollen como emblema os sanandresiños de Teixido.

“Cada figura é un desexo cun corpo pequeno e unha alma antiga: a man ábrese á amizade e guía con sororidade; a pomba voa por riba das feridas; a coroa de Santo André é o escudo contra o medo ao outro; o Santo garda a vida para convivila; a barca é compañeira de quen marcha e regresa; o peixe, fartura sinxela, promesa do sustento; a herba de namorar danza cos ventos e a escaleira leva os nosos pés alá arriba onda ás estrelas”, debulla Felloza.

“A nave que leva os sanandresiños é tamén a nosa: unha barca de palabras que nos permite chegar a porto, mesmo cando o mundo semella navegar aloulado por discursos que afunden toda humanidade. Nestes tempos convulsos a palabra pode ser tamén pomba da paz, sobrevoando ruídos que confunden o rumbo, levando mensaxes de consolo a quen as precisar. As historias son escaleiras invisibles que nos permiten subir por riba das derrotas. E cada conto, cando é verdadeiro, arrecende como unha flor, abrindo camiños no ar para aqueles que prenden o sono con medo”, asegura a responsable do festival.

Felloza estrea o espectáculo 'Memorias do lume', que defende a narración oral como acto de resistencia, de coidado e de transmisión

Entre o 30 de xuño e o 5 de xullo, Compostela convértese nun dos grandes escenarios do festival, con 24 propostas de artistas galegos, estatais e internacionais. O espectáculo Artiloxios, do aragonés Oswaldo Pai, no Teatro Principal (luns 30 - 19h) abre a programación na capital cunha viaxe a través de máquinas imposibles, trebellos imaxinativos e contos que celebran o absurdo e a creatividade.

Tamén o día 30, ás 21h, os xardíns do CSC Maruxa Coralia acollen a estrea absoluta de Memorias do lume de Soledad Felloza, un exercicio de autonarración onde corpo, voz e memoria se entrelazan para manter aceso o facho do que fomos e do que poderiamos ser. Un espectáculo que defende a narración oral como acto de resistencia, de coidado e de transmisión.

Castelao será o protagonista da segunda xornada (1 de xullo, de 11.30 a 20.30 horas) cunha lectura pública de Como dicía Castelao no Panteón de Galegas e Galegos Ilustres. A actividade está aberta á cidadanía que pode participar lendo, escoitando ou formando parte do garda-escoita que asegurará que nunca falte público neste acto colectivo. Haberá un peche musical a cargo de Bouba Pandeireteiras ás 21.00 horas no CSC Maruxa Coralia.

O 1 de xullo celebran unha lectura pública de 'Como dicía Castelao' no Panteón de Galegas e Galegos Ilustres

O mércores 2, as contadas espallaranse durante a mañá polos centros socioculturais da cidade. No CSC Marrozos, Paula Carbonell e Nuria Vázquez presentarán Un neno, un can, un gato e un pito, unha sesión para pequenos e maiores onde os contos camiñan, saltan e voan ao ritmo da imaxinación. Tamén haberá funcións de Dani Blanco (12h, CSC Vite, Circo de contos) e Lorena Pinheiro (12h, CSC Santa Marta, Cucú tapa o cu).

A partir das 19.15h do día 2 de xullo Manuel Gago e Rafa Quintía guiarán unha andaina especial (prazas esgotadas) polas rúas de Santiago sobre o Mapa dos seres máxicos do Reino de Galicia seguida dunha presentación do propio mapa no CSC Maruxa Coralia (entrada libre ata completar a capacidade).

Manuel Gago e Rafa Quintía guiarán unha andaina especial polas rúas de Santiago sobre o 'Mapa dos seres máxicos do Reino de Galicia'

Na mañá do xoves 3 os contos volverás aos centros socioculturais composteláns da man de Cris Collazo (11.30h, CSC Fontiñas, Procúrase Pepa a Loba), Charo Pita (12h, CSC da Gracia, Andar aos biosbardos) e Luís Prego e Samuel Soto (12h, CSC Figueiras, Na punta do pé). Pola tarde desenvolverase o roteiro narrado A pegada de Castelao na compañía de Carme Varela e Quico Cadaval, xa coas reservas completas.

O narrador portugués Miguel Gouveia traerá dende Figueira da Foz historias que xorden do cotián e convidan a compartir emocións. Estará o 3 de xullo ás 21h no CSC Maruxa e Coralia co espectáculo para público adulto Vénme ao bico un conto. Unha experiencia viva de comunicación e encontro entre quen conta e quen escoita, onde a imaxinación restaura o mundo palabra a palabra.

O venres 4 seguirán as contadas pola mañá e ás 21 horas, no CSC Maruxa Coralia, o festival explora as marxes da realidade con Carmen Conde en O que non estaba escrito. Unha oportunidade para mergúllase nas historias que nunca pasaron ao papel, mais que viven na memoria oral e na imaxinación. Conde estará acompañada de Aida Cobas, unha das novas voces da narración oral galega que se estrea nesta edición do Atlántica.

O sábado 5 de xullo Larraitz Urruzola estrea en Galicia Historias de ida e volta no Museo do Pobo Galego, ás 12 do mediodía. Un encontro para público familiar (+5 anos) no que conflúen contos populares, mitoloxía e memoria compartida. A través da súa experiencia vital entre Euskal Herria e Galicia, Larraitz ofrece unha mirada feminista e sensible sobre dúas culturas irmás, unidas pola palabra e a tradición.

E pola noite, ás 21horas no CSC da Rocha Forte, tempo para a estrea absoluta de Contara, de Celso Fernández Sanmartín, unha colleita de historias de vida para público adulto. Contos escoitados ao pé da cociña e nas leiras, historias doutras persoas que o narrador lalinés devolve coa súa palabra viva, directa e sen artificios. 

O narrador portugués Miguel Gouveia traerá dende Figueira da Foz historias que xorden do cotián e convidan a compartir emocións. Larraitz Urruzola estreará en Galicia 'Historias de ida e volta'

Co leitmotiv da memoria como amuleto protector, o Festival Atlántica pon o foco no poder simbólico da narración oral como acto de protección e resistencia nesta edición. 

O concello de Teo tamén convida a veciñanza a gozar da narración oral en espazos naturais, escolares e patrimoniais. Oswaldo Pai levará ao parque dos Tilos os seus Artiloxios para nenas e nenos a partir de 8 anos. A narradora Aida Cobas presenta A fada do saco verde, un espectáculo que transforma os medos infantís en aventuras con maxia e tenrura. E Atenea García dará vida á proposta para público adulto Vicio houbo sempre.

Toda a información sobre a ampla programación do Festival Atlántica e as actividades para as que é preciso reservar convites está no sitio web do certame.