Xa é un clásico das nosas letras e ten no seu palmarés nomes tan relevantes coma os de Berta Dávila, Alberto Ramos, Anxos Sumai, Marcos Calveiro ou Gonzalo Hermo. O Premio de Narrativa Breve Repsol vén de botar a andar a súa décimo sétima edición, outra volta da man da Secretaría Xeral de Política Lingüística, para procurar unha nova historia.
A biblioteca viguesa Juan Compañel acolleu hai poucos días a presentación da nova edición do certame, que serviu tamén para amosar a propia bagaxe de obras premiadas mediante a entrega dunha colección de todas elas. Porque a presentación foi tamén un paso máis do proxecto Bibliotecas Galegas coa Narrativa Breve Repsol, que achega unha destas coleccións a cada biblioteca pública do país.
![](https://praza.gal/storage/uploads/ima-frepsol-lanzamento-pnb-2023-01-6a6362a.jpeg)
Son xa arredor de 4.500 exemplares, editados por Galaxia, distribuídos para "reforzar e facer máis visible a creación e o talento literario" do país que, di a Fundación Repsol, son "os verdadeiros artífices do galardón". Neste sentido, a entidade pon o acento na importancia de levar "contando historias dende 2006" co "obxectivo de fomentar a cultura e a lingua galega".
O prazo de presentación de obras ao XVII Premio Narrativa Breve Repsol está aberto ata finais de xullo
Neste tempo, destacan, foron xa case 500 as obras presentadas. Dende 2010 é a Fundación Repsol e non a refinaría da Coruña a que impulsa o certame en colaboración con Política Lingüística.
A última novela procedente deste certame que viu a luz foi, o pasado decembro, Os corpos dos Romanov, de Alberto Ramos. Nos anos previos lograron a distinción traballos como Eternity, de Xosé Monteagudo ou Illa Decepción, de Berta Dávila, que xa lograra o premio en 2023 c'O derradeiro libro de Emma Olsen.
Tal e como indican as bases do certame, o prazo de recepción de obras está aberto ata o 31 de xullo e a súa extensión non pode superar os 120 folios nin baixar dos 50. O galardón está dotado cun premio de 12.000 euros, ademais da publicación da novela pola editorial Galaxia.