O proxecto impulsado polos concellos de Ames, Carballo, Pontevedra, Santiago e Teo anunciou os seus 16 gañadores nas súas distintas categorías
O certame Enreguéifate deu a coñecer os gañadores e gañadoras da súa sétima edición. Como en edicións anteriores, o certame contou con dúas categorías: unha xeral, para calquera persoa, e outra escolar, para o alumnado dos centros educativos galegos non universitarios. Nesta ocasión había oito premios en cada unha das categorías: á regueifa máis brava, á máis aguda, á máis diversa, á máis reivindicativa, á mellor cantada, á mellor falada, á máis inclusiva e á máis entroideira.
O proxecto bateu este ano o seu récord de participantes, ao recibir preto dun cento de vídeos (96) procedentes de máis dunha vintena de concellos galegos. "Unha cifra de récord que confirma a boa saúde da regueifa e da improvisación oral", destacaron os seus organizadores.
A alta participación "confirma a boa saúde da regueifa e da improvisación oral", destacan os seus organizadores
Enreguéifate é un proxecto impulsado polos concellos de Ames, Carballo, Pontevedra, Santiago de Compostela e Teo que apoia a difusión da improvisación oral en verso (regueifa) para contribuír por medio dela á promoción do uso da lingua galega. Os vídeos gañadores poden verse na web do certame ou na canle de Youtube.
O xurado estivo composto por Manolo Maseda, mestre, músico e regueifeiro; Séchu Sende, mestre, escritor e regueifeiro; Bea Vilaverde, técnica do Departamento de Lingua do Concello de Santiago de Compostela; e Lucía Ferro, técnica do Servizo de Normalización Lingüística do Concello de Ames.
Gala Enreguéifate - Regueibertso
Os premios entregaranse o 19 de maio en Santiago na Gala Enreguéifate - Regueibertso
O 19 de maio ás 11:30 horas terá lugar a entrega de premios nunha gala no Auditorio de Galicia, en Santiago. O evento será ademais unha celebración conxunta co Regueibertso, un programa apoiado pola Deputación da Coruña que procura a sensibilización lingüística e a difusión da regueifa e o bertsolarismo entre a xente nova.
Xurdido en 2016 dentro do Proxecto Regueifesta, colectivo educativo da Asociación ORAL, o Regueibertso consiste nun intercambio entre alumnado improvisador de Galicia e do País Vasco. Este ano, a convivencia entre escolares regueifeiras e bertsolaris terá lugar en Santiago durante a fin de semana das Letras Galegas e concluirá coa participación da rapazada na gala do Enreguéifate - Regueibertso.
Categoría xeral
- Regueifa máis brava: Paco Felípez e Oscar García, "Veciños ben levados" (Carballo e Malpica).
- Regueifa máis aguda: Arrieiro e Chaminho, "Video-regueifa atlántica" (Malpica e A Coruña).
- Regueifa máis diversa: Escola da Regueifa de Carballo, "A nosa propia melodía" (Carballo).
- Regueifa máis reivindicativa: Ministras, "Se nós fósemos ministras" (Pontevedra)
- Regueifa mellor falada: ex aequo para Guerreiras regueifeiras, "Cidades galegas" (Santiago de Compostela), e Iria e Javi, "Vivan as nosas poetas" (Santiago de Compostela).
- Regueifa mellor cantada: Asociación Cultural Coro Virxe da Renda, "Cantar e desfrutar" (Poio).
- Regueifa máis inclusiva: Teiseiros Regueifeiros, "Non hai quen viva! Regueifa do alugueiro" (Centro de Inclusión Fundación da Santa Cruz en Vigo).
- Regueifa máis entroideira: premio deserto.
Categoría escolar
- Regueifa máis brava: Os falabarato, “CEIP Plurilingüe de Nétoma-Razo” (Carballo)
- Regueifa máis aguda: 6º B Quiroga Palacios, "Regueifa do banquete" (CEIP. P. Cardeal Quiroga Palacios, Santiago de Compostela).
- Regueifa máis diversa: Regueifeiras do Rosalía, "Regueifa pola diversidade" (IES Plurilingüe Rosalía de Castro, Santiago de Compostela).
- Regueifa máis reivindicativa: Regueifeiras do Camballón, "Altri non! Mina non!" (IES Marco do Camballón, Vila de Cruces.
- Regueifa mellor falada: A cuarta revolta, "Continuemos co legado" (CPI As Revoltas, Cabana de Bergantiños).
- Regueifa mellor cantada: Regueifeiras de Dodro, "Emoción ou razón?" (CPI Eusebio Lorenzo Baleirón Tarrío, Dodro)
- Regueifa máis inclusiva: Radio Regueifa Inclusiva, "Somos diferentes, somos referentes" (IES do Milladoiro / CEE Manuel Navalón, Ames e Santiago de Compostela).
- Regueifa máis entroideira: As Entroideiras, "O Entroido galego" (CEIP San Martiño, Pontevedra).
