O Diario Oficial de Galicia publicou este xoves o inicio dos trámites para declarar o Xogo dos Birlos de Galicia como Ben de Interese Cultural na categoría de patrimonio inmaterial
O Diario Oficial de Galicia publicou este xoves o inicio dos trámites para declarar o Xogo dos Birlos de Galicia como Ben de Interese Cultural na categoría de patrimonio inmaterial. O obxectivo é dotar os birlos (tamén coñecidos como bolos celtas) coas máximas medidas de protección "para salvagardala como unha manifestación da identidade galega e preservar a súa transmisión ás xeracións futuras".
No texto que introduce a resolución da Dirección Xeral de Patrimonio Cultural, destácase quea práctica do xogo dos birlos de Galicia "ten unha clara compoñente identitaria" e configúrase como "unha manifestación inmaterial sobranceira". O expediente e deberá resolverse no prazo máximo de vinte e catro meses a partir deste momento, un tempo no que se poden presentar alegacións e tamén informes que apoien a declaración.
No texto que introduce a resolución, a Dirección Xeral de Patrimonio Cultural destaca que a práctica do xogo dos birlos de Galicia "ten unha clara compoñente identitaria" e configúrase como "unha manifestación inmaterial sobranceira"
O texto publicado no DOG destaca que o xogo "presenta unha variada gama de modalidades, consiste en lanzar ou facer rodar unha bóla contra unha serie de birlos co obxectivo de derrubalos e desprazalos o máis lonxe posible, conxugando a plasticidade no tiro coa dinámica do exercicio e coas calidades físicas de forza, potencia e coordinación".
Os birlos celtas, como se recolle na páxina que o Consello da Cultura dedica aos xogos tradicionais do país, presentan "infinidade de variantes en Galicia" das que a Dirección Xeral de Patrimonio Cultural destaca os bolos do Val Miñor, bolos da Comarca de Viana do Bolo, bolos de Xove, bolos O Canteiro, bolos en liña, bolos do Barbanza e bolos A Cova.
Os birlos celtas, presentan "infinidade de variantes", das que se destacan os bolos do Val Miñor, bolos da Comarca de Viana do Bolo, bolos de Xove, bolos O Canteiro, bolos en liña, bolos do Barbanza e bolos A Cova
O texto salienta que "os xogos dos birlos, como práctica tradicional, foron transmitidos de xeración en xeración oralmente e pola práctica mesma do xogo". "Dado que a regulación dos birlos era coñecida polo xeral da poboación, non se percibiu a necesidade de fixar as normas por escrito; así como tampouco foi recollido polos medios de comunicación locais nin, agás excepcións, foi plasmado en obras doutro tipo", engade
O texto salienta que "os xogos dos birlos, como práctica tradicional, foron transmitidos de xeración en xeración oralmente e pola práctica mesma do xogo"
Dende a Consellería de Cultura, Lingua e Xuventude avógase por "conservar esta forma de expresión con tan importante arraigo popular", considerando que os birlos foron unha das principais formas de lecer no pasado e motivo de unión entre comunidades, e dado que está "diminuíndo a capacidade de transmisión a través da práctica e das persoas que gardan este saber nas súas distintas variantes espalladas por toda Galicia".
