O Consello da Cultura Galega e o grupo de investigación Hispona publican para a súa libre consulta máis de 3.500 carteis, panfletos e adhesivos recompilados durante décadas polo coruñés Miguel Gutiérrez
En 1976, con apenas 13 anos, o coruñés Miguel Gutiérrez comezou a recoller carteis e pasquíns de propaganda política nas rúas. Medio século despois segue a facelo e o seu xa é un fondo histórico en toda regra. "Non se trata dunha colección estritamente sistemática", pero si cunha gran "dimensión histórica e cultural", recoñece sobre a súa enorme colección, agora tamén dispoñible en internet grazas ao labor do Consello da Cultura Galega da man do Grupo de Investigación Hispona da Universidade de Santiago.
Máis de 3.500 carteis, panfletos, adhesivos e outros documentos están agora abertos á libre consulta, trazando un mapa de milleiros de loitas e esperanzas a través dun "fondo valioso para coñecer a transición política e o proceso de construción da democracia", resume o historiador Emilio Grandío, membro de Hispona. "É fundamental -agrega- que a cidadanía coñeza este patrimonio".
Como explica o propio Grandío no sitio web do proxecto, a consulta deste fondo "mergúllanos especialmente naqueles primeiros anos da nosa democracia", a un tempo no que as rúas eran "espazo de convivencia" onde "se difundía e onde se atopaba toda esta propaganda". "A propaganda e a información eran tanxibles, tiñan textura" nunha cultura democrática con "todo por construír".
"Pon sobre a mesa e visualiza o inxente traballo daqueles anos. Moi especialmente da xente anónima, nunca recoñecida, que quería un futuro dialogado en paz e democracia"
"O Fondo de Propaganda Política Miguel Gutiérrez pon sobre a mesa e visualiza o inxente traballo daqueles anos. Moi especialmente da xente anónima, nunca recoñecida, que quería un futuro dialogado en paz e democracia", sinal Grandío. E fixérono xerando "ilusión" en "tempos duros", tanto "pola incerteza do futuro como porque había que afastar os usos e abusos dun réxime ditatorial de moitas décadas".
Alén da propia dixitalización, a publicación do Fondo Miguel Gutiérrez chega traendo consigo media ducia de itinerarios para coñecelo. Así, por exemplo, CCG e Hispona achégannos ás diversas reivindicacións aglutinadas ao redor do Día da Patria Galega ou Día Nacional de Galicia nos tempos da Transición, ou aos tempos en que nacía "unha nova sociedade: do poder local ao pacifismo".
A "construción dun Estatuto" de Autonomía para o noso país, o xurdimento, consolidación e desaparición de diversos partidos políticos, a fin da ditadura ou a "escola de democracia" que supuxo a fin do franquismo son outros dos vieiros propostos. Son só algunhas das posibilidades para percorrer un fondo que, explica o Consello da Cultura, "se integra dentro dunha liña de traballo prioritaria" da institución para "afondar na memoria da Transición galega.
