- 🟪🟧🟦EN VINTE | Vinte en Chantada. A grandeza dun pobo faina a súa xente
Este sábado 7 inaugúrase a mostra no Pazo de Sabadelle, cun amplo programa no que participan Marisa Álvarez Landesa ou Xurxo Souto
"Toda Galicia vai nela". Así se referiu Ramon Otero Pedrayo á Carta Xeométrica de Domingos Fontán nunha conferencia que ofreceu no Centro Galego de Bos Aires en 1947, con Castelao entre os asistentes. Levara unha copia do pioneiro e exacto mapa creado polo xeógrafo de Portas, que xa tivera un papel protagonista en Arredor de si, novela na que a Carta adquire un gran protagonismo cando o tío de Adrián Solovio pide que lle leve o Mapa de Fontán ao seu leito de morte.
Para Otero Pedrayo, que posuía un exemplar orixinal na súa casa de Trasalba, o mapa de Fontán falaba por si mesmo, era todo un símbolo do país. [Unha ducia de curiosidades ao redor da 'Carta Xeométrica' de Fontán].
Agora esa mesma frase vai dar nome a unha exposición ao redor da Carta Xeométrica de Fontán que se vai poder ver dende este venres no Pazo de Sabadelle, en Chantada. A mostra, que conta coa colaboración do Concello de Chantada, chega no 180 aniversario da súa impresión en París e vai ser inaugurada este sábado cun amplo programa de poesía, música, pintura e diferentes presentacións no que participan persoas chegadas de distintos lugares de Galicia.
A exposición, que se poderá visitar de forma libre nos vindeiros meses, toma o seu título dunha frase de Otero Pedrayo sobre o mapa de Fontán, que elevou a símbolo do país
Así, estarán as pintoras Marita Carmona e Alba Fernández; as poetas Marisa Álvarez Landesa e Elba Grande e o poeta Correa Correadoira; a deseñadora de Chantada Dánae Mariño fará unha performance poética con varios deseños e modelos. Ademais, Xurxo Souto presentará o seu libro Somos un pobo de artistas e ofrecerá un show falando do pasado e presente da música en Galicia para rematar coa presentación de Xeografías, proposta intimista da artista, Sofía Espiñeira.
Esta exposición, que inaugurará a enxeñeira de Camiños e Portos, Gemma Rojo, ten entrada libre e gratuíta para todas as persoas interesadas, e poderase visitar no Pazo nos vindeiros meses. "Interésanos dar a coñecer aquelas persoas e cousas que consideramos teñen relavancia na nosa historia e deben preservarse na nosa memoria”, explica Xosé Figueroa Lorenzana, do Pazo de Sabadelle.
“Estas actividades son recordatorios de partes importantes da historia de Galicia e axudan a divulgar e poñer en valor a nosa cultura e tradición. No Concello de Chantada apostamos desde o comezo por esta cita que mestura distintas artes e que está aberta a todas as persoas interesadas”, destaca pola súa banda o concelleiro de Cultura do Concello de Chantada, Manuel Diéguez.
