Están previstas mobilizacións en apoio de Palestina nas tres etapas que descorrerán polo país, onde tamén haberá unha xornada de descanso o luns en Pontevedra
Xa en anteriores edicións a participación do equipo ciclista Israel-Premier Tech en La Vuelta ou este mesmo ano en O Gran Camiño provocou protestas cidadás pola violencia indiscriminada do estado israelí contra a poboación civil palestina. Pero nesta edición da principal carreira ciclista estatal as mobilizacións están a lograr interferir na competición deportiva, con manifestantes que lograron frear o equipo Israel na proba contra o reloxo por equipos o 27 de agosto en Figueres e que levaron a organización a anular os tres últimos quilómetros da etapa que este mércores rematou en Bilbao.
Neste contexto, La Vuelta e o equipo Israel chegan este domingo a Galicia, cunha etapa que partirá da Veiga, en Asturias, e rematará en Monforte. O luns Pontevedra acollerá a xornada de descanso da competición, pero o martes haberá outra etapa integramente en Galicia, con saída de Poio e Chegada ao castro de Herville, en Mos, e o mércores os ciclistas deixarán o país saíndo do Barco de Valdeorras en dirección ao alto do Morredero, en León.
"Así como se boicoteou á Sudáfrica racista, hoxe é a quenda de Israel", reclama a asociación Galiza por Palestina
Hai tempo que distintos colectivos de apoio a Palestina xa amosaron a súa intención de mobilizarse contra o equipo Israel, como fixo Galiza por Palestina, que anima a "denunciar o uso do deporte como ferramenta de sportwashing por parte de Israel". Galiza por Palestina salienta que "segundo a Convención Internacional contra o Apartheid no Deporte (1985), os estados que manteñen políticas de segregación racial e opresión sistemática non deben participar en competicións internacionais. Así como se boicoteou á Sudáfrica racista, hoxe é a quenda de Israel".
A asociación fai "un chamamento en Galiza a portar bandeiras palestinas e mensaxes de denuncia do xenocidio durante o percorrido da Vuelta, visibilizando así a solidariedade co pobo palestino".
