Unha ducia de avistamentos pouco comúns

Oso no parque do Invernadeiro

Máis dun século despois da súa desaparición da zona, un oso é gravado "reiteradamente" no Macizo Central ourensán por cámaras automáticas dispostas para a próxima película de Pela del Álamo producida por Zeitun Films, que facilitou as imaxes.

Foguete Soyuz

Poucos días antes de que se soubese dun oso no parque do Invernadeiro, o 28 de abril eran avistados os restos dun foguete ruso Soyuz desfacéndose ao entrar na atmósfera fronte ás costas da Coruña, como reflicten estas imaxes de GCiencia, tiradas de @Canaan_1983 e @Anton1BL.

Baleas azuis

Nos últimos anos xa non están sendo tan raros os avistamentos de baleas azuis na costa galega, como esta fotografada en Fisterra polo BDRI.

Oso no Courel

Antes de que aparecese un oso no Invernadeiro outras cámaras xa gravaran en 2014 outro exemplar no Courel.

Ovnis

Son varios os avistamentos de obxectos voantes non identificados rexistrados en Galicia , como o de Noia de 1993 ilustrado nesta imaxe tirada dun expediente desclasificado polo Ministerio de Defensa do que deu conta Europa Press.

Tiburóns nas rías

Tiburóns hai moitos na costa galega, pero non é habitual ver un peregrino ou momo nas rías.

Lobos mariños

A Coordinadora para o Estudo dos Mamíferos Mariños vén divulgando os seus traballos de avistamento e recuperación de todo tipo de animais no litoral galego.

Aurora boreal

É un fenómeno difícil de ver en Galicia pero non imposible ao que GCiencia dedicou esta reportaxe.

Eclipse

As eclipses son máis habituais, pero non todas provocan a expectación da de 1905 que contamos nesta reportaxe.

Irlanda desde A Coruña

Máis alá da ciencia, o 'Lebor Gabála Érenn', ou Libro das Invasións de Irlanda, que se conserva no Trinity College de Dublin e vén de ser exposto na Cidade da Cultura, asegura que Breogán foi quen de avistar Irlanda desde A Coruña.

Submarinos nazis

Foron varios os submarinos alemáns avistados nas costas galegas durante a Segunda Guerra Mundial, como este U 966 Gut Holz fotografado pola forza aérea estadounidense mentres era atacado o 10 de novembro de 1943 fronte a Estaca de Bares, onde afundiu. 

As torres das Pontes e Meirama

As torres das centrais térmicas das Pontes, de 356 metros, e Meirama, de 200, poden ser vistas desde Vilalba ou Santiago respectivamente. Pero hai quen di que as puido avistar desde lugares moito máis afastados. Nestes tempos de cousas raras, todo pode ser.