Unha ducia de finalistas dos Premios Martín Códax, a gran gala da música galega

A gala

A XIII edición dos galardóns organizados pola asociación Músicas ao Vivo entregará os seus premio o vindeiro 27 de maio no Pazo da Cultura de Pontevedra. A gala será transmitida pola plataforma agalega.gal e na canle de youtube de Músicas Ao Vivo.

Os e as finalistas déronse a coñecer o pasado 6 de maio na tradicional festa celebrada na terraza das Bodegas Martín Códax

O público e os socios e socias de Músicas ao Vivo aínda poden votar os seus proxectos favoritos a través da páxina web oficial ata o 24 de maio. O voto do público contará cunha ponderación do 50% trala selección do xurado.

Homenaxe a Los Suaves

Entre os protagonistas da gala estarán Los Suaves, Premio Honorífico dos Premios Martín Códax da Música 2026, que recoñecen "non só a dimensión artística" da histórica banda ourensá, "senón tamén o seu impacto cultural, social e emocional na historia recente da música galega".

• A paixón por Los Suaves que vai alén dun concerto
• ENTREVISTA | "Los Suaves nunca foron un grupo de moda porque quedaron a vivir en Ourense"

Hugo Guezeta

Os premios constan de 19 categorías, 16 delas dedicadas a artistas e proxectos musicais, con tres finalistas por categoría. En total, 48 nomes escollidos por un tribunal profesional de renome formado pola pianista e investigadora artística María Domínguez, a artista Blanca Pereira, coñecida como Rumia, o guitarrista da banda Brutal, Isidro Otero, o xornalista Luis Pardo, e a xestora cultural Marta Horjales.

Na categoría de Músicas Urbanas os proxectos finalistas son Hugo Guezeta Habló Pablo e Lumedoloop

Alana

Na categoría de Música Folk os proxectos finalistas son Guezos, Abril e Alana

Un dos principais sinais de identidade de Alana é a mestura da música tradicional con ritmos de base electrónica e pop. A formación está a piques de publicar o seu segundo disco, do que xa coñecemos este adianto, unha canción que parte dunha recollida a unhas veciñas de Terroso, unha parroquia do municipio ourensán da comarca de Verín e na que colaboran as Pan Sen Fron nunha caste de rave tradi.

Galician Army

Na categoría de Electrónica os proxectos finalistas son Galician Army, Kike Varela e Løch

Galician Army, o dúo formado por Alberto Prado e Sergio Vallejo é cada vez máis coñecido pola súa presenza en festivais e as numerosas colabos e remixes con artistas como Grande Amore, De Ninghures, The Rapants, Fillas de Cassandra, Xoel López, Iván Ferreiro, Tanxugueiras ou Bokanka Kostova. Pero tamén por sesións coma esta.

Antía Muíño

Na categoría de Canción de Autor/a as finalistas son Sangre de Muerdago, Antía Muíño e Zeltia Irevire

Antía Muíño obtivo xa o galardón á mellor artista emerxente nos Premios Martín Códax 2022. Nese ano publicou o seu primeiro disco, Carta Aberta, que tivo continuidade en 2025 co EP Vente vindo/Eu en ti e este mesmo ano 2026 co seu segundo álbum, Anfibia por Veces.

Lamatumbá

Na categoría de Orquestras e Grupos e Música De Verbena os proxectos finalistas son La Fórmula, Orquestra Bravú Xangai e Lamatumbá

Os ourensáns Lamatumbá foron un dos grandes fenómenos musicais galegos na primeira década do século con catro álbums de estudio e mais outro en directo e himnos como "Licorcafé". O pasado ano deixáronos este novo tema.

Loita Amada

Na categoría de Rock e Punk os proxectos finalistas son Broken Peach, Stoned At Pompeii e Loita Amada

Loita Amada, o proxecto liderado por Pablo Carracedo AKA Jásper ten xa tres álbums publicados. O último, Resistir é vencer, do pasado ano. Dedicou un dos seus temas máis coñecidos, "O seu puñal", á loita contra Altri.

Lula Mora

Ademais dos galardóns por xénero musical, os Premios Martín Códax inclúen un recoñecemento a artistas emerxentes. Este ano os/as finalistas son: Lula Mora, Apolo18 e Raze.

Lula Mora é un dúo cun pé en Galicia e outro en Canarias, as terras de orixe das súas dúas integrantes: Sara Caride e Silvia Izquierdo. O pasado ano publicaron o seu primeiro álbum.

As mellores salas

Ademais dos premios a artistas e proxectos musicais, os Premios Martín Códax inclúen outros tres galardóns, os Premios Organistrum, que recoñecen outros actores imprescindibles para a boa saúde do sector musical galegos.

O primeiro deles entrégase cada ano a algunha sala de concertos e este ano as finalistas son a Sala Capitol de Santiago, a Fábrica de Chocolate Club de Vigo e o Krazzy Kray! de Cambados

• Tres salas de concertos para os Premios Martín Códax: "o traballo das salas pequenas é moi importante no ecosistema musical"

Os mellores festivais

Este ano os finalistas ao premio ao mellor festival son o Festival Arteficial de Ribadavia, o Festival Alternativo Millo Verde de Redondela e o Surfing The Lerez de Pontevedra, tres citas afastadas do concepto de macrofestival.

A mellor comunicación e difusión musical

Finalmente, no premio á mellor comunicación e difusión musical, que todos os anos recoñece proxectos informativos e de crítica, que serven de altofalante para as artistas e bandas do país, este ano os finalistas son Fogar dos Festivais, Galicia En Concierto e A Canle de Rodri Míguez.