Unha ducia de nomes de persoeiros en edificios (ou rotondas)
Hai uns días o Concello de Santiago bautizou o estadio municipal de San Lázaro co nome da futbolista Verónica Boquete e o BNG propuxo facer o mesmo con Castelao e a nova estación intermodal da cidade. Repasamos unha ducia de nomes de persoeiros dados a todo tipo de edificios (ou rotondas) por toda Galicia.
-
01
Estadio Verónica Boquete
Por unanimidade decidiu a Corporación de Santiago darlle o nome da futbolista galega ao estadio municipal de San Lázaro
-
02
Estación Castelao
O BNG vén de propoñer darlle o nome de Castelao á futura estación intermodal de Santiago e o resto de grupos do Concello de Santiago deron o seu visto e prace no pleno municipal.
-
03
Aeroporto Rosalía de Castro
Tras unha petición unánime do Concello, Fomento aceptou hai dous anos que o aeroporto santiagués de Lavacolla pasase a chamarse Rosalía de Castro
-
04
Estación Curros Enríquez
Tamén sobre a mesa está desde hai anos a proposta de que a estación intermodal de Ourense que recibirá o AVE leve o nome de Curros Enríquez, autor do poema 'Na chegada a Ourense da primeira locomotora'
-
05
Avenida e rotonda Manuel Fraga
O político que ideou a Cidade da Cultura dá nome á avenida de acceso á mesma, na que unha rotonda lembra a súa figura desde 2015, cando se inaugurou cun acto que custou 6.000 euros
-
06
Auditorio Carmen Estévez
Antes de ser o propio Manuel Fraga o protagonista na Cidade da Cultura foi a súa muller, Carmen Estévez, a que deu nome ao auditorio municipal da súa vila natal, Vilalba
-
07
Cidade Deportiva González Laxe
O complexo deportivo municipal de Cerceda leva o nome de quen foi presidente socialista da Xunta entre 1987 e 1990
-
08
Aeroporto Peinador
O empresario Enrique Peinador impulsou a principios do século XX unha liña de tranvía cuxa parada no límite municipal entre Vigo e Mos recibiu o seu nome e acabou designando tamén ao aeroporto que alí se construíu máis tarde en terreos en parte propiedade daquel filántropo
-
09
Hospital Álvaro Cunqueiro
O escritor e director de Faro de Vigo acabou dando nome ao novo hospital da cidade aberto en 2015 para o que, cando se comezou a deseñar, a daquela conselleira socialista de Sanidade do bipartito, María José Rubio, amosara a súa predilección por algún nome de muller ligado á investigación científica
-
10
Teatro García Barbón
Durante anos en Vigo non se podía un referir ao gran teatro da cidade co seu nome orixinal ligado ao do empresario e mecenas sen recibir unha chamada da todopoderosa Caixanova advertindo de que esa, a da propia caixa, era a designación oficial do edificio. Hoxe é o Teatro Afundación.
-
11
Rotonda Che Guevara
A avenida do Che Guevara en Oleiros é coñecida pola rotonda coa imaxe do guerrilleiro, inaugurada en 2008 cun custo de 180.000 euros
-
12
As mulleres reclaman o seu protagonismo
A Coruña, Ourense, Pontevedra... Son moitas as cidades e vilas que están intentando dar ás mulleres o protagonismo que merecen tamén os seus nomes nos espazos públicos