A Xunta reinicia a tramitación do proxecto logo de que na documentación orixinal figurasen datos doutra planta similar que a empresa impulsa a 200 quilómetros
A comezos de outubro a Consellería de Medio Ambiente iniciou a tramitación dunha planta de biogás impulsada na Limia por unha filial de Ence, Biofertilizantes Xunqueira de Ambía SL. Pero a documentación xustificativa do proxecto que someteu a información pública incluía datos ambientais para outra planta de biogás impulsada tamén por Ence en Zamora, no municipio de Santovenia, a 200 quilómetros de distancia.
Advertida a consellería por Praza.gal desa circunstancia, Medio Ambiente atribuíu a responsabilidade á empresa e argumentou que analizaría a documentación "cando corresponda". Agora, mes e medio despois, a consellería reinicia a información pública do proxecto indicando no Diario Oficial de Galicia (DOG) que a empresa "presentou un escrito en que indicaba que na documentación exposta ao público existían erros, polo que a presenta de novo, corrixida".
O proxecto para a Limia dunha planta de biogás a partir de residuos agrogandeiros, abondosos nesa comarca e que veñen causando unha importante contaminación das augas, foi publicado no DOG o venres 3 de outubro. Praza.gal detectou na documentación diversos datos ambientais que non se correspondían coa comarca da Limia senón con Zamora, onde a empresa impulsa outra planta similar.
A documentación errada identificaba augas subterráneas para a "planta de biogás de Santovenia", empregaba datos da "estación meteorolóxica de Zamora" ou analizaba o tráfico na estrada "ZA-702"
Entre outras cuestións, nun índice e no título dun dos apartados da documentación con erros falábase do "Plan de caracterización de suelos y aguas subterráneas para el proyecto de planta de biogás de Santovenia", a localidade zamorana na que se impulsa o outro proxecto. Nese apartado detallábanse unha serie de coordenadas xeográficas coa súa numeración incompleta, o que impedía comprobar os emprazamentos a que se facía referencia.
Noutro punto da documentación sinalábase que os datos ambientais empregados supostamente para o proxecto da Limia foran os da "estación meteorolóxica de Zamora".
Igualmente, tanto no Estudo de Impacto Ambiental como no proxecto para a súa Autorización Ambiental Integrada e no resumo non técnico da documentación citábase, a efectos de analizar os efectos no tráfico, a estrada ZA-702, que descorre polo municipio zamorano de Santovenia.
Medio Ambiente di que o contido da documentación "é responsabilidade da empresa"
Este diario preguntou o martes 7 de outubro a Medio Ambiente se a documentación era correcta con esas referencias a Santovenia e Zamora e non a Xunqueira de Ambía e A Limia e se a Xunta ía instar a súa corrección. A resposta da consellería foi que "como en todos os procedementos de avaliación ambiental de proxectos e actividades, a documentación que está a exposición pública é a elaborada pola empresa promotora do proxecto para acompañar o expediente, polo que todo o seu contido é responsabilidade da empresa".
O departamento que dirixe a conselleira Ángeles Vázquez engadiu que "esta documentación será avaliada, cando corresponda, por todos os órganos sectoriais competentes no marco do procedemento de Autorización Ambiental Integrada".
Segundo reflicte agora o DOG, seis días despois da alerta deste diario á Xunta, o 13 de outubro a empresa "presentou un escrito en que indicaba que na documentación exposta ao público existían erros, polo que a presenta de novo, corrixida". Na nova documentación agora exposta ao público xa non aparece ningún dos erros advertidos por Praza.gal á consellería, que reinicia así a exposición pública do proxecto por outro prazo doutros 30 días hábiles.
