O Goberno galego vén sendo corrixido polo TSXG por outorgar subvencións ao emprendemento despois da data límite para gastalas
Hai anos que o Tribunal Superior de Xustiza de Galicia (TSXG) pon "en cuestión" o fomento do emprego e o emprendemento por parte da Xunta pola excesiva rigorosidade e erros cos que xestiona as súas subvencións. En xuño Praza.gal divulgou unha sentenza na que o Goberno galego foi condenado pola súa falta de "boa fe" por dar un "anticipo" de axudas a autónomos despois da data límite fixada para gastalas, "actitude" que o TSXG cualificou como "pouco dilixente".
Nos últimos meses o mesmo tribunal fixo públicas cando menos tres sentenzas distintas. Condenan actuacións similares do Goberno galego ao conceder axudas cun prazo de execución que "xa expirara" e polo tanto cun requisito de execución "imposible desde un punto de vista material e físico".
As axudas en cuestión agora analizadas polo TSXG en tres sentenzas con datas do 5 e 30 de maio e 4 de xullo correspóndense co programa denominado Emprendemento PLUS, convocado no verán de 2023. As tres empresas afectadas viron denegadas as súas solicitudes en outubro e recorreron. A daquela Consellería de Promoción do Emprego e Igualdade aceptou as súas alegacións e concedeu as subvencións, pero fíxoo notificando as súas decisións en xaneiro de 2024 e mantendo o prazo para a súa execución establecido inicialmente na convocatoria das axudas, o 31 de decembro do ano anterior.
A xustiza lembra á Xunta que "os actos de contido imposible son nulos de pleno dereito"
Ante esta situación as empresas recorreron á xustiza, recursos que a Xunta tentou invalidar sen éxito. E o que concluíu o TSXG nos tres casos é similar, que o Goberno galego debe dar ás empresas un prazo de dous meses para que poidan cumprir e xustificar as condicións das subvencións a que tiñan dereito.
Nunha das sentenzas o tribunal constata que o prazo consignado pola Xunta nas resolucións coas que outorgou as axudas facía "imposible desde un punto de vista material e físico dar cumprimento ao seu contido, por razóns obvias, por canto que se notificou unha vez que aquel prazo xa expirara, polo que de pouco valería á recorrente que se lle conceda unha subvención se despois non pode xustificar o investimento concedido porque xa transcorreu o prazo para iso, o que lle impediría ser beneficiario".
Outra das sentenzas constata que ao aceptar as alegacións da empresa contra a denegación inicial da axuda "houbo de ampliarse o prazo de execución, toda vez que se a subvención non se concedía, non realizaría o investimento, ao tratarse dunha axuda finalista, establecéndose un prazo de execución a unha data en que a subvención non fora aínda concedida, senón que estaba denegada".
En todos os casos o tribunal lembra que "os actos de contido imposible son nulos de pleno dereito".
