A precariedade e a reivindicación de melloras salariais e nas condicións de traballo traen dúas folgas ao comercio en Galicia, tanto de alimentación como xeral, nesta fin de semana.
O persoal dos supermercados da Coruña está chamado á folga os días 15, 16 e 17 pola mellora das condicións e o do comercio en toda Galicia o sábado, tamén contra a apertura en festivos
O persoal do comercio de alimentación da provincia da Coruña volve á folga este sábado —festivo de apertura autorizada pola Xunta—, o domingo 16 e mais o luns 17 nunha protesta encadrada na mobilización que desde hai meses desenvolve o sector na demanda de melloras no convenio.
CIG, CCOO, UGT e USO —sindicatos na mesa de negociación— convocan estes paros ante o que consideran "inmobilismo" da patronal, logo de que na última xuntanza, con mediación do Consello Galego de Relacións Laborais, non houbese un achegamento de posturas.
Sindicatos como a CIG xustifican estas novas xornadas de folga no "bloqueo no que a patronal do sector ten a negociación do convenio colectivo". Pola súa banda, a parte empresarial, liderada por Gadis e Froiz, responsabilizan os sindicatos desa falta de acordo.
Os sindicatos denuncian o "bloqueo" da patronal á negociación do convenio colectivo na provincia
As xornadas de folga afectan a supermercados —que especialmente na cidade da Coruña están a verse claramente afectados polos paros anteriores— e aos centros loxísticos e chegan lo de que as reunións negociadoras dos pasados venres e luns non lograsen avances.
Ademais, o luns 17 unha manifestación percorrerá as rúas da Coruña a partir das 12 do mediodía. Sairá do Mercado de San Agustín e rematará na Praza de Lugo.
Por outra banda, CIG, CCOO e UGT convocan tamén folga no comercio en toda Galicia para reclamar o dereito ao descanso do persoal e "denunciar o impacto das aperturas en domingos e festivos sobre a conciliación da vida laboral, familiar e persoal".
O persoal do comercio está chamado á folga o sábado para "denunciar o impacto das aperturas en domingos e festivos sobre a conciliación"
A Xunta decidiu o pasado ano que o comercio en Galicia podería abrir os días 26 de xullo, domingo, e o 15 de agosto, sábado festivo. Entre críticas por decidilo "sen consultar" e por apostar por dúas datas especialmente sinaladas e con case nula actividade, os sindicatos responderon convocando folga para esas dúas datas e concentracións desde hai meses reclamando "máis tempo para vivir". Todo nun contexto de reivindicación, paros e protestas nun sector que pide "condicións "dignas".
"Modelo do Madrid liberalizado"
Os tres sindicatos levan tempo denunciando que a Xunta aposta polo "modelo do Madrid liberalizado", comunidade autónoma onde o comercio pode abrir calquera día do ano sen límite. En Galicia son dez os domingos e festivos nos que está permitida a apertura, unha medida xa polémica, que acabou por indignar os sindicatos coa elección da xornada posterior ao Día Nacional de Galicia e do Apóstolo e deste vindeiro 15 de agosto, data na que se concentran máis festas, verbenas, celebracións e xuntanzas familiares.
Ante esa situación, CIG, CCOO e UGT mantiveron a folga no comercio, que se une á que se levará a cabo nos supermercados da provincia da Coruña o sábado, pero tamén domingo e luns. Mentres, o presidente da patronal galega, Juan Manuel Vieites, criticou hai só uns días o incremento da conflitividade en Galicia nunhas declaracións ás que respondeu a secretaria xeral de Comisións, Amelia Pérez.
Afeoulle a actitude de bloqueo das empresas, "que se negan a repartir os beneficios que sempre reclamamos desde CCOO". Ao respecto, sinalou que "se imperase o sentido común na clase empresarial deste país, non teriamos que chegar ata estes extremos".
