A empresa ten que pagar 187.000 euros a dous sindicatos por boicotear unha folga en varios aeroportos, entre eles o de Santiago, desprazando persoal ou establecendo gardas por riba do habitual
O Tribunal Supremo vén de facer pública unha sentenza na que condena a Ryanair a pagar 187.000 euros á Unión Sindical Obrera (USO) e o Sindicato Independente de Tripulantes de Cabina de Pasaxeiros de Liñas Aéreas (Sitcpla) por "esquirolaxe" na folga de tripulantes de cabina pasaxeiros que mantiveron en 2022 en varios aeroportos españois, entre eles o de Lavacolla, en Santiago. No aeroporto galego, segundo estableceran xa outras sentenzas previas de xulgados inferiores, a empresa desprazou persoal de outros países, estableceu gardas por riba do habitual e mudou os seus protocolos para axilizar a substitución de folguistas.
A sentenza agora emitida polo Supremo, con data do 12 de novembro, ratifica en parte outra previa da Audiencia Nacional que en 2023 condenou por esquirolaxe tanto a Ryanair como a dúas empresas que prestan servizo para ela e que tamén estaban afectadas pola folga, Crewlink e Workforce. Agora o Supremo absolve esas dúas empresas por falta de probas de que participasen na vulneración do dereito de folga, pero ratifica a condena de Ryanair, que terá que pagar en solitario unha indemnización de 93.757 euros a cada un dos sindicatos denunciantes.
O Supremo lembra que Ryanair xa fora condenada nunha folga anterior pero "continúa realizando condutas vulneradoras dos mesmos dereitos"
No seu recurso Ryanair alegou que a sanción era excesiva, pero o Supremo considéraa xustificada pola "gravidade das condutas levadas a cabo por Ryanair". A sentenza lembra que a empresa xa fora condenada a indemnizar con 30.000 euros a varios sindicatos por vulnerar outra folga previa, pero "esas indemnizacións non cumpriron a súa función preventiva porque esta mesma compañía continúa realizando condutas vulneradoras dos mesmos dereitos fundamentais". Por iso o Supremo considera que a suba da indemnización nesta nova condena "non pode considerarse desorbitada, inxusta, desproporcionada nin irrazoable".
A condena a Ryanair baséase entre outras probas en inspeccións laborais realizadas nos aeroportos afectados pola folga, entre eles o de Lavacolla, onde "se constatou a comisión de feitos susceptibles de imputación dunha infracción grave, por vulneración do dereito de folga". Esa inspección laboral en Lavacolla xa supuxo unha multa de 7.500 euros ratificada hai uns meses por un xulgado do Social da Coruña, que considerou acreditado que a empresa desprazara a Santiago "un gran número de tripulantes de cabina de pasaxeiros de bases extracomunitarias".
En Santiago a empresa desprazou "un gran número de tripulantes de cabina de pasaxeiros de bases extracomunitarias"
E antes mesmo desa multa laboral e da sentenza que a ratificou, Ryanair xa recibira outra condena por despedir unha tripulante de cabina durante aquela mesma folga de 2022. Ryanair acusara a empregada de incumprir os servizos mínimos pero a xustiza confirmou que a empresa mudáballe os seus cometidos sen antelación para substituír funcións de persoal en folga. Aquel despedimento nulo foi tamén tido en conta como feitos probados na condena agora ratificada polo Supremo.
