O Congreso aproba os seis primeiros membros do novo Consello de RTVE co apoio do PSOE, Unidos Podemos, PNV, PDeCAT, Compromís e ERC -este último, agás Gabriel Rufián-. Entre os elixidos está o galego Víctor Sampedro, catedrático de Opinión Pública e Comunicación Política na Universidade Rey Juan Carlos.
O Parlamento Europeo aproba a reforma electoral que pon en risco a representación de forzas políticas non estatais a partir de 2024 ao elevar o limiar para obter representación do actual 2% ata o 5%. O ditame saíu adiante con 397 votos a prol, 207 en contra e 62 abstencións e a norma agora ten que ser ratificada polos Estados membros da UE. A galega Ana Miranda subliña que a reforma "vai en contra do respecto á pluralidade nacional, o respecto ás nacións sen Estado e o respecto á pluralidade política".
Dimite o presidente da Asociación de Empresarios de Arzúa, Alfonso Gómez Corzo, por "considerar que é o mellor para a entidade". A dimisión do presidente da patronal arzuá, que recolle Radio Arzúa, chega pouco despois de que a entidade ameazase, con cartas asinadas polo propio Gómez Corzo, con accións legais a veciñanza crítica coa mina de Touro-O Pino. Na imaxe, Gómez Corzo (dereita), cun responsable de Cobre San Rafael.
Comeza Sen cancelas, o novo blog de Anxo Lugilde en La Vanguardia no que o tamén colaborador de Praza.gal ofrece análises sobre a política galega. Nesta primeira entrega evoca a polémica afirmación de Manuel Fraga a respecto da mellor preparación dos "fillos de familias prominentes" ao fío do nomeamento que, segundo o Tribunal Superior, a Valedora do Pobo outorgou de xeito "arbitrario" a prol dunha sobriña do antigo presidente da Xunta.
Carmen Martínez-Bordiú xa é duquesa de Franco grazas ao nomeamento que asinou o ex-ministro Catalá un día antes de que o PP perdese o Goberno de España por mor da moción de censura que levou á presidencia ao socialista Pedro Sánchez. Herda o título da súa nai, á que llo concedeu o rei Juan Carlos I unha semana despois da morte do ditador. Publícao hoxe o BOE
"O marisco, para quen o traballa". Os actores Carlos Blanco e Xosé Antonio Touriñán, protagonistas da campaña financiada polas mariscadoras da ría de Arousa para concienciar contra o roubo do marisco que sementan.
A xustiza chilena condena nove ex-militares polo asasinato do músico Víctor Jara en 1973. Jara foi detido tras o golpe de Estado de Pinochet e asasinado pouco despois.
As xuntanzas de Feijóo co presidente de Portugal e mais co ministro das Infraestruturas do país veciño constatan os plans do Goberno portugués para modernizar o seu treito da liña ferroviaria do Porto a Vigo, en marcha dende 2016. Para que a conexión modernizada poida estar operativa o ano que vén é clave a execución da electrificación das vías en Tui, competencia do Adif. Na imaxe, o presidente da Xunta con Marcelo Rebelo de Sousa.
Este martes fanse 12 anos do accidente do metro de Valencia no que morreron 43 persoas. O sinistro tivo varias semellanzas co que sete anos máis tarde deixaría 80 falecidos na curva de Angrois e que facían aínda máis evitable o de Santiago.
As inscricións nas oficinas de emprego descenderon en 6.631 no mes de xuño en Galicia, ata as 170.065; son 19.600 persoas menos na lista do paro rexistrado que hai un ano. No mesmo período a afiliación media á seguridade social incrementouse en 8.408 persoas e volve superar o millón de persoas, con 26.622 afiliacións máis que hai doce meses. Máis información, hoxe en Praza.