A plataforma Galiza con Catalunya manifesta en oito concentracións o seu rexeitamento ao encarceramento de líderes políticos cataláns pola súa vinculación co proceso soberanista. As mobilizacións foron convocadas baixo o lema "Democracia e liberdade". Na imaxe, difundida pola CIG, a concentración de Vigo.
O xuíz de Neumünster mantén a Puigdemont en prisión ata a resolución sobre a súa extradición a España. O ex-presidente catalán foi detido este domingo en Alemaña.
Os Mossos d'Esquadra deteñen a considerada como narcotraficante galega máis buscada, Tania Varela. Varela, avogada de profesión, estaba ata hoxe na lista de persoas máis buscadas da Europol. Foi condenada en 2013 a sete anos de prisión pola súa vinculación a un alixo de 1,7 toneladas de cocaína e estaba ligada ao clan de Oubiña, de cuxo fillastro foi parella. A detención produciuse en Vilanova i la Geltrú e foi adiantada por La Vanguardia.
Aena estenderá ao aeroporto da Coruña a obriga de vender as botellas de auga a un prezo máximo dun euro xa existente en Santiago e Vigo. O ente xestor dos aeroportos españois asume agora unha recomendación emitida hai tres anos pola asociación internacional de aeroportos.
Cristina Cifuentes anuncia unha querela contra os xornalistas Raquel Ejerique e Ignacio Escolar polas información sobre a súa presunta fraude na obtención dun mestrado universitario. A presidenta da Comunidade de Madrid e do PP nesa autonomía advertiuno nun discurso ante a dirección do seu partido.
Ciudadanos anuncia un acordo co PP para apoiar os Orzamentos do Estado tras o paso ao Grupo Mixto da senadora popular Pilar Barreiro, da que os de Rivera esixían a dimisión por estar investigada nun caso de presunta corrupción. Os escanos de C's non son, así e todo, dabondo para que as contas superen o trámite parlamentario.
O conselleiro de Sanidade nega que se produzan "colapsos" nas urxencias hospitalarias, onde só admite "enlentecemento da atención dos pacientes menos graves", asegurou Vázquez Almuiña nunha entrevista na SER
VÍDEO | O PSdeG lucense percorre a deteriorada N-540 que une Lugo e Ourense á altura de Chantada para demostrar os "perigos" desta vía, que acumula anos de fochancas sen arranxar, esixir que Fomento a arranxe.
As protestas en Cataluña pola detención de Puigdemont suman máis de medio cento de feridos e feridas produto das cargas dos Mossos d'Esquadra. O presidente do Parlament, Roger Torrent, pide calma á cidadanía e unidade aos partidos en defensa das liberdades.
Puigdemont pasará a noite no centro penitenciario de Neumünster (Schleswig-Holstein) e declarará este luns ante o xuíz. O Tribunal Superior do land analizará se a entrega a España está legalmente permitida.
