O persoal mobilizado da CRTVG pide á sociedade que se "implique" e reclame "uns medios públicos mellores" no 81º venres negro. "Non che gusta a información que ves sobre sanidade, sobre o paro, sobre protestas veciñais? Bérrao", di Defende A Galega, que reclama o cumprimento dunha lei de medios que leva máis de oito anos de atraso.
Galicia súmase ao canto contra o machismo das mulleres chilenas. Colectivos feministas levan a cabo a coreografía e cantan o tema que se espalla por todas as mobilizacións femininas na Coruña ou en Pontevedra.
O BNG rodea cunha cadea humana o Museo do Pobo Galego en defensa da autodeterminación nun acto simbólico co gallo do aniversario da Constitución española. Máis información, hoxe en Praza.gal.
Néstor Rego non acudirá á rolda de consultas co rei. A Executiva Nacional do BNG sinala nun comunicado que a decisión "non só parte da súa profunda convicción republicana e soberanista, senón tamén de avaliar moi negativamente o papel que a monarquía e a figura do Rei está a desempeñar no contexto actual". O deputado do Bloque fora convocado para a cita co Xefe do Estado o vindeiro día 10.
A Mesa lanza unha campaña para instar a Xunta a pechar un acordo con Movistar+ para subtitular e dobrar filmes e series ao galego, ao xeito do asinado polos gobernos vasco e catalán con esta plataforma. A iniciativa está apoiada pola Asociación Profesional de Actores e Actrices da Dobraxe de Galicia (APRADOGA) e a Asociación Galega de Profesionais da Tradución e Interpretación (AGPTI).
O pleno da Deputación de Lugo aproba os Orzamentos de 2020 cos votos a prol de PSdeG e BNG e a abstención do PP. As contas roldan os 92 millóns de euros e priorizan demografía e emprego, subliñan dende o goberno da institución.
A Casa Real publica o calendario da rolda de consultas para a investidura. A cita de Néstor Rego (BNG) co xefe do Estado é o día 10 ás 11:45 e a de Yolanda Díaz (Galicia en Común), o mesmo día ás 18:15. Pedro Sánchez, Pablo Iglesias e Pablo Casado están citados para o día seguinte.
CCOO e CIG denuncian un novo despido por baixas médicas en Extel, que botou xa catro persoas e segue a prescindir de persoal invocando o artigo do Estatuto dos Traballadores que avalou o Constitucional hai unhas semanas. Os traballadores e traballadoras da empresa están chamados á folga o vindeiro día 9.
O PP carga contra o Concello de Poio porque non organiza "visitas de Papá Noel" para a infancia do municipio polo Nadal pero si do Apalpador, o cal considera "adoutrinar" e "politizar estas datas" por parte do goberno local, de BNG, PSdeG e Avante Poio. Recólleo Pontevedra Viva
Lula da Silva e Dilma Rousseff, absoltos no caso no que eran acusados xunto a outros cargos de desviar diñeiro de empresas públicas para campañas electorais do Partido dos Trabalhadores. (Imaxe: PT)
