A Xunta ultima unha nova campaña de "fomento da natalidade" por ata 700.000 euros. Os anuncios centraranse en "sensibilizar" sobre a importancia da "revitalización demográfica" e difundir medidas do Goberno na materia. As anteriores campañas superaron o millón e medio de euros nun contexto no que os datos de natalidade permanecen estancados nos peores datos históricos.
O TSXG anula o nomeamento de doce altos cargos do Goberno do PP na Coruña ao considerar que foi arbitrario. Cóntao La Opinión de A Coruña
Bruxelas pide aos Estados reter as persoas migrantes máis tempo no centros de internamento e maior número de deportacións. Recólleo Desalambre
O Deportivo empata a 1 gol co Atlético de Madrid nun partido marcado polo forte golpe sufrido polo atlético Fernando Torres, que xa se recupera.
O Parlamento aproba crear unha comisión de seguimento da couza da pataca que poña o foco sobre as medidas de control da praga e os medios para combatela e informe ao respecto. O organismo terá representación da Xunta, a FEGAMP, o Laboratorio Fitopatolóxico de Galicia e a IXP Pataca de Galicia. O acordo chega tras unha transacción de senllas iniciativas de En Marea e PP e foi aprobada por unanimidade na comisión de Agricultura.
Suspendida a folga do sector da estiba ante a negativa da oposición no Congreso a aprobar o decreto lei do Goberno central para liberalizar o sector. Os sindicatos coidan que ese freo á norma "unilateral" abre a porta á negociación.
Condenadas dúas persoas por agresións a policías durante as protestas do cerco en Compostela en 2014. Terán que afrontar un ano e seis meses de prisión e indemnizacións de 6.500 euros.
A aeroliña Norwegian presenta o avión que dedicou a Rosalía de Castro. "Rosalía era ideal, recuperou o galego como lingua de cultura e foi pioneira no feminismo", din dende a compañía.
O xuíz confirma o arquivo do caso Jimmy. Rexeita os recursos da Fiscalía, a LFP e o outro afeccionado deportivista tirado ao río e insiste en que é imposible identificar os autores da morte.
O paro rexistrado descendeu en 154 inscricións en Galicia durante o mes de febreiro e caeu en 23.344 en termos interanuais. No mesmo mes as afiliacións á Seguridade Social aumentaron en 2.816, un 0,30%, e o incremento interanual foi de 18.027, un 1,93%. Máis información, hoxe en Praza.