Crise no Goberno de Navarra. A presidenta, Yolanda Barcina (UPN) destitúe o vicepresidente socialista, e en resposta dimiten os outros dous conselleiros do PSN. A crise iniciouse a pasada semana cando UPN anunciou un novo recorte de 132 millóns, sen o apoio dos socialistas.
Fálase
A prensa internacional debate se a decisión do Tribunal Constitucional exipcio de disolver o Parlamento (con maioría dos Irmáns Musulmáns) e volver concentrar o poder no exército constitúe un golpe de Estado
Antolín Alcántara, secretario confederal de Negociación Colectiva da CIG, condenado a un ano de prisión por desordes públicas no xuízo polos sucesos da folga do metal de 2007. A sentenza absólveo do delicto de danos, e absolve a Víctor García de todos os cargos. A CIG rexeita a decisión e reitera que se trata "dun proceso político que persegue criminalizar o sindicalismo combativo"
El Jueves denuncia que Facebook censurou unha das súas portadas, protagonizada por Rajoy e Merkel
O secretario xeral da Consellería de Cultura e Educación, Jesús Oitavén, asegura no Parlamento que no derradeiro pleno do período de sesións, o día 26, o conselleiro, Jesús Vázquez, presentará o plan estratéxico da Cidade da Cultura. A voceira do PSdeG no debate, Concepción Burgo, lamenta que o Gaiás se manteña como un mero "comedeiro de cartos públicos".
O partido UPyD propón fusionar La Rioja, Navarra e Aragón baixo o nome de Ebro Región, a cal non debería descartar incorporar as provincias de Burgos e Soria, di a formación de Rosa Díez. No Diario Vasco.
O BBVA cre que Novagalicia Banco precisa "unha cifra moi relevante" de capital e pide ao Estado decisións sobre as antigas caixas. "As entidades non viables terán que desaparecer", asegura o seu presidente, Francisco González.
O BCE recórdalle a España que para cumprir coa redución do déficit debe facer "fortes recortes do gasto".
A CIG convoca este venres ao mediodía concentracións contra o rescate bancario. Serán ás 12 horas na Coruña (diante do edificio do Banco de España), Compostela (Praza de Galicia), Vigo (no cruce de Colón con García Barbón), Pontevedra (rúa Rosalía de Castro), Burela (diante da oficina de Bankia). En Ourense (rúa Diagonal) será ás 11.30. En Ferrol (Praza de España) ás 11.45. E no Barco ás 20 horas, diante do Concello.