Fálase

Todos os eurodeputados españois do PP votan contra a condena a Hungría por violar dereitos fundamentais. A resolución saíu adiante cos votos dos grupos da esquerda e mais dos liberais e abre a porta a sancións contra o Goberno que dirixe Viktor Orban. O Executivo húngaro aprobou nos últimos anos diversas normas contra as persoas refuxiadas e ONG, entre outras. Dos membros da Cámara de orixe galega que participaron na votación Lidia Senra, José Blanco e Javier Couso votaron a prol das sancións e Francisco Millán Mon (PP), en contra. Tamén apoiou a proposta Josu Juaristi, que comparte escano co BNG.

O xuíz da Púnica investiga se unha fundación de defensa da unidade de España serviu para financiar o PP ilegalmente. Está a contalo a Cadena SER

O Celta homenaxea as Letras Galegas cun tributo aos autores do país e unha bandeira na camisola, hoxe ante o Real Madrid no partido aprazado que se disputa en Balaídos a partir das 21 horas. 

Rajoy expresa a súa "plena confianza" en Catalá, Maza e Moix malia os escándalos que arrodean o ministro e os fiscais, que foron reprobados pola maioría do Congreso. 

Contratos amañados e cartos de subvencións, tras as maiorías absolutas do PP de Madrid. Un informe da Garda Civil sostén que a maquinaria electoral de Aguirre financiouse malversando axudas públicas e con diñeiro de adxudicacións amañadas. 

VÍDEO | A plataforma Queremos Galego anima con este vídeo a participar na súa mobilización deste 17 de maio, a partir das 12 da mañá dende a Alameda de Santiago

O alcalde de Valença reivindica os trens Alfa Pendular -equivalentes a un Talgo para servizos de media e longa distancia como o actual de Lisboa ao Porto- na "ligação de Valença a Vigo e ao Porto, na Linha do Minho, após a eletrificação da linha", traballos que o Goberno portugués xa ten en marcha. Jorge Salgueiro reiterou esta demanda no marco da Comunidade de Traballo Galiza-Norte de Portugal, que dende esta semana preside Feijóo.

Arquivada a investigación aos edís de Vigo Ángel Rivas e Javier Pardo polo pagamento dun plus a un funcionario do Concello. Está a contalo Faro de Vigo

A Garda Civil vincula a Cristina Cifuentes co financiamento irregular do PP de Madrid. Destaca que participou en adxudicacións a Arturo Fernández mentres este financiaba Fundescam, da que ela era patroa. 

A Garda Civil conclúe que o PP de Madrid "sustentou" campañas electorais en "numerosas irregularidades" en 2007 e 2011. O partido "atentou contra principios" como "o necesario equilibrio da concorrencia electoral" a través de "fraude de subvencións, malversación" ou "falsidade", segundo un informe que debulla eldiario.es