Este martes faleceu Bernardo Bastida, ex patrón maior da Confraría de Pescadores e Mariscadores de Ferrol. En 2007 foi detido por impedir -xunto cun grupo de mariñeiros e activistas en pequenas embarcacións- a entrada na ría do primeiro gaseiro con destino á planta de Reganosa. Foi condenado a 13 meses de cadea, aínda que finalmente evitou a prisión. En 2012 entrevistámolo días antes do xuízo aos mariscadores
A Xunta suspende para mañá as actividades no exterior dos colexios na Mariña e no Noroeste da Coruña por mor do temporal. A comisión escolar de alertas mantén vixente a actividade lectiva e o transporte escolar, pero unha vez máis deixa nas mans das direccións dos centros a posibilidade de cancelalos "no caso de que a situación meteorolóxica supuxese un risco superior ao declarado".
O xulgado de Ribeira arquiva as acusacións contra a esposa do asasino confeso de Diana Quer. O instrutor considera que "none xisten no momento actual indicios dabondo para dirixir o procedemento" contra ela. Inicialmente o xuíz consideraba que non podía ser desbotada a súa participación nos feitos.
O BOE publica a modificación do Regulamento de Circulación Ferroviaria que acelera as melloras de seguridade iniciadas tras o accidente de Angrois. Entre outras cousas, adianta a substitución do sistema Asfa analóxico polo dixital, que puido evitar o accidente do Porriño de hai ano e medio.
O PP reclama que o Concello de Lugo organice unha xura da bandeira española na cidade para responder á "crecente demanda" cidadá ao respecto. Recólleo El Progreso (Na imaxe, anuncio dun destes actos na Coruña).
O Hospital Álvaro Cunqueiro de Vigo rexistra espera de ata seis horas en pacientes para ser atendidos en urxencias ao aumentar os casos de gripe. A situación repetiuse nos últimos días noutros centros hospitalarios galegos, coma o CHUAC coruñés, onde se denunciou "colapso", negado pola Xerencia.
Ciudadanos sitúase como terceira forza en intención de voto (18.6%) na enquisa de Celeste-Tel que publica eldiario.es. O PSOE sobe ata o 25,1% e o PP baixa do trinta por cento, mentres que Unidos Podemos cae ata o 16,9%.
O dicionario en liña da RAG superou en 2017 os 20,5 millóns de consultas, un 42% máis que os 14,4 millóns de 2016. Son 56.000 visitas ao día, tantas como termos inclúe.
A Academia Galega do Audiovisual publica en Papeis da Academia unha reportaxe de María Yáñez sobre a nova xeración do audiovisual galego, Nacidos despois de Sempre Xonxa. 14 mozos e mozas de menos de 30 anos aos e ás que haberá que emprestar moita atención.
O Grupo Zeta anuncia o peche das históricas revistas Interviú e Tiempo. Está a contalo eldiario.es
