As pensións sufrirán en 2017 a maior perda de poder adquisitivo en 5 anos. Subirán un 0,25%, fronte a un incremento do IPC do 1,5%; o Goberno vetou a tramitación da suba do 1,2% aprobada polo Congreso. O Executivo baralla un aumento do 1% do salario dos empregados públicos, o que tamén lles suporía perda de poder adquisitivo.
Fálase
Case catro de cada dez mulleres asasinadas por violencia machista este ano denunciaran o seu agresor. As expertas sinalan puntos negros do sistema como un déficit de formación, sistemas de valoración do risco pouco eficaces ou falta de medios.
A Xunta frea a constitución da Área Metropolitana de Vigo vinte e catro horas despois da primeira xuntanza do seu órgano de goberno O Goberno galego denega a súa inscrición no Rexistro de Entidades Locais despois que os alcaldes do PP optasen por boicoteala. Detállao Faro de Vigo.
O Consello de Ministros aproba o recorte de 5.493 millóns de euros nos orzamentos do Estado na liña do esixido pola Comisión Europea.
Feijóo reitera que a denuncia polos atrasos nos tratamentos de Hepatite C é "indigna". Afírmao nunha entrevista con Europa Press que a axencia publica na súa web e na que engade que esta demanda, impulsada por médicos e afectados e asumida pola Fiscalía, responde a un intento de "politizar a sanidade".
A Xunta publica a asignación dos 1,6 millóns de euros de axudas a empresas editoras de medios de comunicación, distribuídas entre 17 compañías. Detalla tamén os 200.000 euros de achegas a publicacións periódicas en galego a unha vintena de empresas.
As grandes empresas seguen despedindo milleiros de traballadores e traballadoras no terceiro ano de "recuperación económica". Nos primeiros dez meses de 2016 19.875 empregados e empregadas foron despedidas en ERE en toda España, sobre todo en bancos, teleoperadoras e comercio téxtil
Oito alcaldes e alcaldesas de PSOE, Marea e BNG, que representan o 83% da veciñanza, celebran a primeira xuntanza da área metropolitana de Vigo e disolven a mancomunidade. Chaman ao PP a incorporarse á unidade. A Área implantará o seu propio plan de transporte público, ampliando liñas e frecuencias.
Estados Unidos expulsa 35 espías rusos e sanciona nove entidades polos supostos hackeos realizados durante a campaña electoral para prexudicar a campaña de Clinton. Obama atribúe "ás máis altas instancias" do goberno de Moscova o roubo de datos e as filtracións. Trump convocará os serizos secretos para avaliar o caso.
O Caderno da Crítica de Ramón Nicolás publica o balance anual do Taboleiro do libro galego, realizado cos datos achegados por librarías de todo o país. O último día de Terranova (Manuel Rivas), Os elefantes de Sokúrov (Antón Riveiro Coello) e Amor é unha palabra coma outra calquera (Francisco Castro) encabezan a lista de novelas máis destacadas. O deserto (María do Cebreiro) en poesía, Historia das historias de Galicia (Isidro Dubert) en ensaio, Europa Express (Andrea Maceiras) en xuvenil, Esmeraldina, a pequena defunta (Ledicia Costas), Canta o cuco (Uxía e Magín Blanco) en libro-cd e O bichero VI (Davila) en banda deseñada súmanse ao cadro de honor.