Feijóo confirma que irá pedir o voto para Albiol en Catalunya "como presidente dunha nacionalidade histórica". Segundo adiantou nunha entrevista en RNE, participará en actos do PP catalán os días 5 e 18 de decembro, nos que advertirá de que "se pode ser catalán" como "forma de ser español" e cargará contra Puigdemont, ao que cualifica de "nocivo". O presidente da Xunta xa pedira o voto para Albiol nas eleccións de 2015 e para Sánchez-Camacho en 2012.
O Congreso debaterá a lei para permitir máis investimentos aos concellos coas contas saneadas porque o Goberno de Rajoy rexistrou 4 minutos tarde o veto á proposta, que promove Unidos Podemos. O Executivo pretendía aplicarlle a esta norma o mesmo bloqueo que á lei para o traspaso da AP-9. Cóntao eldiario.es
Cuac FM amplía a súa difusión coa incorporación á plataforma de televisión de R e cunha nova versión da súa aplicación en Android. A radio comunitaria coruñesa segue adiante coa súa campaña #CuacResiste tras o peche das súas emisións analóxicas por mor da ameaza dunha sanción de ata 200.000 euros por parte da Xunta.
Pintan touros nos bancos do Concello de Sarria inspirados na bandeira LGTBI. O consistorio reparará o mobiliario danado, na rúa Castelao, e seguirá a instalar os bancos previstos coas mesmas cores. (Imaxe: BNG)
Medio Rural permite dende hoxe volver tramitar permisos de queimas controladas pola "diminución de risco de incendios". Paralelamente, o dispositivo de extinción de incendios forestais vai reducindo a súa dimensión.
O PP vasco acusa a Ciudadanos de axitar o "nacionalismo español" contra Euskadi e o seu financiamento. Asegurouno o líder da formación popular no País Vasco, o ex-ministro Alfonso Alonso, ao fío da nova negociación do cupo. Recólleo El Mundo.
Xunta e concellos acordan o bombeo máis eficiente do Verdugo para paliar a seca. A solución custa 5,5 millóns e o Concello di estar disposta a asumilo.
O Congreso permitirá ás persoas transexuais cambiar legalmente o sexo e o nome sen declararse enfermos. A Cámara vota unha proposición do PSOE que apoiarán Ciudadanos e Unidos Podemos.
Falece o fiscal superior de Catalunya, José María Romero de Tejada. Acábao de comunicar o ministro de Xustiza, Rafael Catalá.
O Goberno central nega a axuda financeira ás autonomías se non asinan un convenio que beneficia as farmacéuticas. O acordo entre o Executivo e a patronal garante un nivel de gasto público anual constante en medicamentos de marca.