O mural de Diego As (Diego Anido) na Ronda da Muralla de Lugo baseado na figura de Xulio César, elixido mellor graffiti do mundo no mes de agosto na votación organizada pola rede Street Art Cities. O artista xa fora distinguido, este mesmo ano, como campión das Graffiti Battles organizadas pola Liga Nacional de Graffiti. [Imaxe: CC-BY-SA Praza.gal]
A empresa de compoñentes eólicos Vestas anuncia o "cese da produción" na súa factoría de Viveiro, onde traballan máis dun cento de persoas. A compañía anuncia a mesma decisión para outras fábricas en Alemaña e Dinamarca e avanza que prevé o peche na Mariña contra finais de ano. Asegura tamén que prevé recolocar o persoal noutras fábricas en España.
A Xunta ratifica que rexeita a suba do salario mínimo interprofesional acordada polo Goberno de España porque "non é o momento" e non foi pactada coa patronal CEOE. Afirmouno a conselleira de Emprego, María Jesús Lorenzana, en declaracións á Radio Galega. Na imaxe (do pasado xullo), Lorenzana asinando un convenio coa Confederación de Empresarios de Galicia.
A erupción volcánica de La Palma continúa a través de oito bocas polas que continúa emerxendo o magma, segundo informa ao vivo a Radio Televisión Canaria, en cuxa web pode seguirse ao vivo. O presidente do Goberno de España, Pedro Sánchez, desprazouse á illa para seguir as tarefas de supervisión da erupción e de asistencia á poboación. Prevese á evacuación de entre cinco e dez mil persoas e polo momento os danos son só materiais (Imaxe da retransmisión da RTVC).
Comeza unha erupción volcánica na illa canaria de La Palma. Iniciouse nunha zona forestal non habitada tras varios días de sismos e cos dispositivos de emerxencia en alerta para posibles evacuacións. [Imaxe: @interiorgob]
As principais cidades e vilas galegas acollen na tarde deste sábado concentracións polo asasinato machista dunha veciña da Coruña. Colectivos feministas continúan a actualizar a listaxe de mobilizacións.
Membros de todos os grupos parlamentarios e a Valedora do Pobo gardan un minuto de silencio ante o Parlamento en repulsa polo asasinato machista dunha veciña da Coruña, que xa foi confirmado formalmente como un caso de violencia de xénero. Colectivos feministas continúan a actualizar a listaxe de mobilizacións en vilas e cidades para mañá, sábado 18.
Detido en Madrid o home acusado de asasinar á súa parella na Coruña. Segundo recolle La Opinión, o sinal do teléfono móbil do sospeitoso permitiu dar co seu paradoiro horas despois de que un dos fillos da muller, de 52 anos, atopase o seu corpo sen vida na casa.
Iván Raña anuncia a súa retirada do tríatlon profesional. O de Ordes, de 42 anos, seguirá disputando outras probas pero fóra do circuíto de profesionais. "É un ata logo, sinto que agora é o momento", di o que foi campión do mundo en 2002, dúas veces campión de Europa e que ten dous diplomas olímpicos. Foto: Federación Galega de Tríatlon.
A Xunta plasma no DOG o levantamento de restricións pola COVID-19 que estará vixente dende as 00:00 do sábado, coa fin das limitacións ás reunións entre persoas non conviventes como principal novidade. Reflicte tamén a ampliación de capacidade nas mesas de bares e restaurantes.
