Todos os grupos do pleno de Pontevedra agás o PP censuran que Rajoy defendese o militar golpista Salvador Moreno ao cuestionar que se retirase o seu nome a unha rúa da cidade. O voceiro popular, Jacobo Moreira, reduciu o comentario a un "chascarrillo". "Dejemos de hacer el parvo", reclamou durante o debate da moción, formulada polo BNG. Crónica de Pontevedra Viva
Miguel Anxo Fernán-Vello asume a portavocía de En Marea no Congreso durante este semestre. O deputado por Lugo comezou a exercer este venres o posto rotatorio que durante a lexislatura xa ocuparon Alexandra Fernández, Antón Gómez-Reino e Yolanda Díaz. Este era un dos acordos de funcionamento da formación, integrada no grupo parlamentario con Unidos Podemos en En Comú.
Así controla e limita a Fundación Franco o acceso a case 30.000 documentos oficiais dixitalizados grazas ao diñeiro público. Relátao o xornalista Carlos Hernández nesta reportaxe: Unha visita (obrigada) á Fundación Francisco Franco
O Supremo impide que Oriol Junqueras, Jordi Sànchez e Joaquim Forn saian da cadea para ir ao Parlament.
Catalunya e Galicia encabezaron en novembro a redución no ritmo de creación de empresas, segundo os datos publicados este venres polo INE. Durante 2016 seis de cada dez concellos galegos perderon empresas.
A Eurocámara propón a celebración das eleccións europeas entre o 23 e o 26 de maio de 2019. Os gobernos estatais teñen agora que determinar a data exacta e no caso español, a xornada elixida será con toda probabilidade o día 26, cadrando así coas eleccións municipais e mais coas autonómicas na maioría das comunidades 'de vía lenta', que como normal xeral se celebran o cuarto domingo de maio cada catro anos.
A praia do Rostro (Fisterra) e outros areais da Costa da Morte énchense de botes de leite condensado ou paquetes de tabaco, parte da carga que hai uns días caeu ao mar dende o buque “MSC Eloane” a 40 millas da costa. Cóntao Que Pasa na Costa
O Colexio Oficial de Psicoloxía detectou 31 casos de intrusismo en Galicia en 2017. Entre as situacións investigadas están a de exercer sen contar coa titulación, publicidade enganosa, ou anunciarse como especialista sen contar coa debida formación
O Goberno impón un límite do 50% do gasto aos ministerios ata que haxa orzamentos. Os gastos adicionais terán que contar co visto bo do Ministerio de Facenda
A Audiencia Nacional cita a Villar-Mir para tomarlle as pegadas por un documento ligado á trama corrupta Lezo, na que está investigado. Está a contalo eldiario.es
