O BNG presenta ás 8 deste serán a súa candidatura ás municipais en Santiago. Xunto ao candidato, Rubén Cela, e ao portavoz nacional do Bloque, Xavier Vence, intervirán outras persoas como o escritor Suso de Toro ou a profesora Margarita Ledo, integrante da lista.
A Audiencia de Ourense ratifica a condena de 9 anos de inhabilitación a José Luis Baltar polos 104 enchufes na Deputación previos ao congreso do PP ourensán de 2010. A sentenza, que non pode ser recorrida, desbota o recurso do ex barón popular e indica que fixo os contratos "con conciencia de que faltaban os principios básicos de calquera contratación pública". Consulta a sentenza íntegra nesta ligazón
UGT financiaba gastos sindicais coas tarxetas black de Caja Madrid, segundo conta El País. Un membro do sindicato recoñece que os 80.000 euros do seu cartón empregáronse en cartelería, pancartas e hoteis e viaxes pagadas para delegados da central.
O BNG de Ourense recada entre a veciñanza os 60 céntimos de canon asignados a unha cafetaría da cidade dende os anos 60 co obxectivo de denunciar "irregularidades" como a "ocupación sen autorización" dun espazo público por parte da empresa.
Centos de persoas agardan en Lugo para entregar o seu currículo e optaren a un dos 75 postos de traballo que ofrece un novo centro comercial no barrio da Abella. Recólleo El Progreso
Veciños de Coia protestan ante os xulgados de Vigo "contra a criminalización da protesta" no xuízo a Diego Lores, un veciño ao que acusan de agresión e atentado á autoridade durante unha protesta contra o barco instalado na rotonda do barrio.
O informe da Comisión de Bioética vetado pola Consellaría critica a imposición de límites ao dereito á atención sanitaria, analizando o Real Decreto 16/2012 que esixe a condición de asegurado ou beneficiario para ter unha atención sanitaria completa. O documento sinala que a norma puxo en cuestión "o valor superior da igualdade, recollido no artigo 1.1 da Constitución española, e o dereito fundamental á saúde"
A xustiza investiga a relación entre edís do Goberno municipal de Verín e algúns dos maiores contratistas do Concello por un suposto delito de prevaricación
Catro anos despois do accidente de Fukushima, continúa a descontaminación da área afectada pola radiación. Foi limpado un 16% do total e o número de persoas evacuadas pasou de 420.000 a 240.000.
A UE impón grandes limitacións para que os eurodeputados e eurodeputadas poidan ter acceso aos documentos da negociación do TTIP. Só lles permite ver unha parte, de forma individual, nunha sala segura, sen dispositivos electrónicos nin bolígrafos e prohíbelles divulgar o seu contido.