UGT abandona o comité de folga de Xustiza, segundo revela o vicepresidente da Xunta, Alfonso Rueda. O sindicato únese a CCOO, que xa deixara o órgano de representación dos traballadores durante o paro, agora suspendido. O Goberno galego deu un ultimato ás centrais para que acepten a súa última oferta.
O ex-conselleiro Javier Guerra cambia o PP por Ciudadanos xunto a medio cento de militantes do partido en Vigo, segundo avanza La Voz de Galicia. Guerra perdeu en 2016 o congreso dos populares vigueses fronte á tamén ex-conselleira Elena Muñoz, actual líder local da formación.
Carlos Lixó gaña o Premio a artigos xornalísticos de lingua do Concello de Carballo co texto Alpabardas verdes. O artigo do investigador e profesor de Historia na USC, tamén poeta, será publicado o vindeiro día 27 en Praza.gal e nos demais medios colaboradores do certame.
Bélxica rexeita a extradición a España dos ex-consellers cataláns Comín, Serret e Puig. O xuíz Llarena non emitira unha orde de detención en España cando pediu extraditalo, segundo obriga a normativa da UE.
A contorna de Ponte Caldelas rexistra unha trintena de tremores de terra dende a tarde deste martes. O máis forte acadou unha magnitude de 3,1 segundo recolle o IGN.
Roupa de cama dos hospitais públicos de Ourense acaba no Hospital de Salamanca. IU-Equo advertiuno no marco dunha denuncia nas Cortes de Castilla y León sobre as deficiencias do servizo da empresa concesionaria da lavandaría nese hospital castelán, Ilunion, do grupo ONCE. Cóntao eldiario.es
BDS-Galiza e Mar de Lumes convocan unha concentración en solidariedade co pobo palestino este mércores ás 19:30 en Vigo (diante do MARCO). As Marchas da Dignidade convocan concentracións de protesta contra os ataques israelís este venres ás 20 horas na Coruña, Compostela, Ourense e Vigo.
Falece Tom Wolfe, figura esencial do Novo Xornalismo. O escritor e periodista morreu esta tarde en Manhattan aos 87 anos logo de ser hospitalizado por unha grave infección.
Membros das corporacións do Concello e da Deputación de Pontevedra concéntranse para amosar "rexeitamento e indignación ante o masacre de Gaza" e reclaman que o Goberno de España condene as accións de Israel na zona.
Son xa 59 os palestinos mortos polo exército israelí na fronteira de Gaza, segundo o xornal Haaretz, nas protestas polo traslado da embaixada de EE.UU. a Xerusalén. Hai ademais 2.771 feridos
