O goberno de Lalín promove declarar "persoa non grata" a Federico Trillo tras o ditame do Consello de Estado que responsabiliza a Defensa do accidente do avión Yak-42. Un dos 62 militares falecidos no sinistro, lembra, era Vicente Agulló, veciño de Lalín. A proposta debaterase no pleno municipal a través dunha moción.
O paro rexistrado sobe en Galicia en 2.360 persoas en decembro e as afiliacións á Seguridade Social descenden en 4.800, fronte á importante baixada do desemprego da historia que se dá no Estado, onde cae en case 87.000 persoas en decembro e onde o número de cotizantes sobe en 68.000. Máis información, esta mañá en Praza.
Navantia asina con Iberdrola os contratos para a construción de 42 jackets do parque eólico mariño no Reino Unido.
A UDEF acusa altos cargos do PP de presionar en Moncloa en favor de Pujol. Terían feito xestións en 2001 para que organismos públicos financiasen proxectos amañados en África da familia do ex-president.
Os concellos galegos ultiman as cabalgatas de reis deste xoves. Hoxe presentouse a de Vigo, desta volta inspirada no "mundo xurásico" e composta por 14 carrozas, e en Valença do Minho avanzáronse detalles da cabalgata da eurocidade, que percorrerá as principais rúas da vila portuguesa e mais de Tui.
O ex-alcalde do Grove Alfredo Bea denuncia o xornalista Nacho Carretero polo seu libro 'Fariña', sobre o narcotráfico galego. A axencia Europa Press detalla na súa web que o antigo rexedor esixe unha rectificación e indemnización pola mención á súa condena que finalmente acabou en absolución. Bea Gondar foi alcalde entre 1983 e 1991.
O Sergas lanza unha aplicación móbil para que os pacientes poidan "orientarse" dentro dos hospitais de Vigo e Lugo, nos que se rexistraron múltiples queixas pola dificultade para atopar os diferentes servizos. A app chámase SIGUE e a Xunta ofrece a súa descarga en castelán na Play Store de Google e mais na App Store de Apple.
Aumenta o malestar no Goberno de Portugal pola decisión española de construír un almacén nuclear a apenas 100 quilómetros da fronteira, en Almaraz (Cáceres). O ministro portugués do Ambiente non acudirá á xuntanza prevista co gabinete de Rajoy para o día 12 se esa construción é confirmada, advirte. Recólleo Público
Acusan La Voz de Galicia de publicar unha nova falsa, a partir dunha fotografía dun lobo devorando un cabalo supostamente tirada por un gandeiro de Abadín. A imaxe pode verse en publicacións do ano 2010 e foi tomada en Asturias. A noticia xa foi retirada da edición dixital do xornal
A Xustiza declara “ilegal” o apoio do Concello de Santiago ao boicot a Israel, campaña que fora promovida polo BDS (Boicot, Desinvestimentos e Sancións). Así o informa a AGAI.
