A ex-ministra Elena Salgado defende que a reforma do artigo 135 da Constitución fíxose para salvar os servizos públicos e evitar o rescate do país. “En parte o logramos e en parte non”, di a socialista na súa comparecencia na comisión de investigación do Congreso sobre o rescate financeiro.
A Fiscalía investigará as responsabilidades civís polo colapso da AP-6 e Feijóo di que a responsabilidade do mantemento da autoestrada é “exclusiva” da concesionaria, como na AP-9 galega, “nin da Xunta nin de Fomento”.
Hai hoxe sete anos os daquela Príncipes de Asturias inauguraron os dous primeiros edificios da Cidade da Cultura. A última decisión sobre o polémico e inacabado complexo ideado en 1999 por Fraga é a de converter en auditorio ao aire libre o burato que deixou o Teatro que non se fará.
Feijóo anuncia a figura do Comisionado para o Xacobeo 2021, que ocupará o cargo agora vacante de conselleiro-delegado da sociedade pública que o xestiona. Será elixido a dedo e estará por riba do director xerente actual, cuxo soldo anual é de 46.900 euros e que segundo Feijóo “xestiona o día a día” pero non pode asumir un evento como o de 2021.
Un tren Alvia con 473 pasaxeiros que circulaba remolcado por outro entre Ferrol e Madrid desengánchase preto de Segovia. A dobre composición (dous trens enganchados) é habitual en datas con alta demanda, como foi o 7 de xaneiro en que ocorreu o incidente, relatado por La Voz, no que o sistema de seguridade detivo os dous Talgo de xeito automático.
A Xunta sanciona a OHL con 41.000 euros por unha infracción moi grave da prevención de riscos laborais. Segundo o anuncio publicado no DOG, a Emprego considera á construtora de Villar Mir responsable de pactar cunha subcontrata para eludir as súas propias responsabilidades nesa materia.
O goberno local lucense recomenda ao PP que pida ao Goberno central a "xura de bandeira" que reclama ao Concello. Os populares formularon esta petición para atender a "crecente demanda" cidadá ao respecto, dixeron.
O informe preliminar da autopsia demostra que Diana Quer morreu esganada. O documento foi xa entregado ás representacións legais da familia da moza asasinada e mais do asasino confeso, que xa foi trasladado ao cárcere da Lama dende Teixeiro. Recólleo Faro de Vigo
O Consello da Cultura Galega esixe "o máximo grao de protección" para o Centro Gallego de Bos Aires, abocado á venda, e para o Museo Carlos Maside. Nun informe, a entidade considera que o patrimonio cultural que custodia o centro "constitúe un legado imprescindible que merece o máis alto grao de protección xurídica para garantir a súa integridade e a súa conservación no futuro".
Pa, barriñas enerxéticas, traxe de auga ou eslinga para remolque, entre as numerosas cousas do “kit de emerxencia” que a DGT pide levar “sempre” en prevención dunha “situación grave, como unha nevada”.
