ENQUISA | O PSOE sería a forza máis votada en eleccións xerais, aínda que comeza a acusar desgaste. O PP sería segundo cunha lixeira tendencia á baixa, Ciudadanos estaría na terceira posición e Unidos Podemos e as súas confluencias, na cuarta. É o que indica o inquérito de Celeste-Tel para eldiario.es
O TSXG confirma que a folga do persoal da Xustiza deu lugar a unha caída histórica dos desafiuzamentos en Galicia, cun descenso interanual do 52% ao pasar de 732 a 346 lanzamentos no segundo trimestre do ano, na liña do primeiro.
Bombeiros e axentes forestais revelan novos incendios en Pedrafita, Pantón ou Xinzo de Limia. Medio Rural non ofreceu, polo momento, información ao respecto. A Consellería si divulgou que o incendio de Mondariz xa está controlado. (Imaxe do incendio de Pedrafita, tomada por membros da Brif Laza)
A aeroliña portuguesa TAP suspende as súas conexións de Lisboa á Coruña e Vigo pola "enorme dificultade" para atopar tripulacións, di. Recólleo Faro de Vigo
Pablo Casado afirma que o PP "comparte moitas ideas" co partido ultradereitista Vox aínda que "outras, non" e subliña a súa "excelente relación" co presidente desa formación, antigo dirixente dos populares.
Un incendio declarado despois da seis da tarde en Mondariz abarca xa 120 hectáreas e obriga a declarar a Situación 2 por risco para o núcleo de Barro, na parroquia de Gargamala. (Imaxe de @BrifLaza). Consulta aquí a información actualizada.
A ultradereita congrega máis de 10.000 persoas nun acto de Vox en Madrid con propostas como suprimir as comunidades autónomas e frases inspiradas en Trump como “os españois estarán primeiro” ou “xuntos faremos España grande outra vez”.
As mulleres son xa o 53% da xudicatura en toda España -o 58% en Galicia, segunda comunidade tras Euskadi- pero só o 27% da cúpula dos seus órganos superiores. eldiario.es publica unha ampla análise das diferenzas de xénero na xustiza en todo o Estado a unhas semanas de coñecer quen será o próximo presidente ou presidenta do Poder Xudicial. En Galicia, tres de cada catro membros da carreira xudicial menores de 45 anos son mulleres.
Coa baixada das temperaturas e a chuvia a Xunta da por extinguidos ou controlados tres incendios que nas últimas horas queimaron 250 hectáreas en Nogueira de Ramuín (173), Verín (37) e A Gudiña (36), e por controlado outro de 18 hectáreas no parque do Xurés, en Muiños. Está activo outro de 20 hectáreas tamén na Gudiña. Nos últimos días producíronse outros incendios divulgados por bombeiros e axentes forestais, pero dos que a Xunta non informou en aplicación das habituais restricións informativas ao respecto. Na imaxe, de @briftabuyo, o incendio de Verín.
A Universidade de Vigo abrirá unha consulta pública para poñer nomes de mulleres destacadas aos seus tres edificios administrativos de entre un listado de seis posibles. Para Xerencia-Servizos Centrais propóñense a María Wonenburger e Exeria, para a Reitoría a Sofía Casanova e Ernestina Otero, e para o Anexo á Xerencia a Filomena Dato e Ángela Ruíz Robles.
