130 toneladas de lixo na Coruña e 20 en Panxón, Nigrán, o recollido nas dúas principais festas de San Xoán en praias. Na capital coruñesa foron case 60 toneladas menos que o ano pasado mentres a vila pontevedresa mantívose nas mesmas cifras. Os dous concellos impulsaron campañas de sensibilización para a recollida do lixo e respecto dos areais.
VÍDEO | “Este pandeiro que toco / é de pelica d'ovella”, unha das moitas variantes dunha cantiga popular similar á que Faltriqueira interpreta neste vídeo, foi a peza que tiveron que analizar este sábado os opositores aspirantes a unha praza de mestre de música.
Pórtico ou Mario Conde, entre as empresas e particulares galegos que se manteñen no listado de morosos que vén de facer público a Agencia Tributaria por terceiro ano consecutivo.
Un morto por bala nunha liorta na praia de Arealonga, en Chapela, Redondela, nunha noite de San Xoán tranquila no resto de Galicia. A policía detivo o presunto autor do disparo, con antecedentes, que acabou coa vida dun mozo de 25 anos que celebraba a festa no areal próximo a Vigo. No resto de Galicia os incidentes reportados polos servizos de emerxencias foron as habituais intoxicacións etílicas e feridas menores por liortas ou polo salto de fogueiras. (Foto: Xunta de Galicia)
Preto de 14.500 persoas opositan este sábado en toda Galicia para acceder a algunha das 1.043 prazas convocadas por Educación
Un incendio en Ourense obriga a desaloxar varias vivendas de forma preventiva. O lume está controlado.
O Tribunal de Contas súmase ao Constitucional e carga contra os créditos extraordinarios para armamento, que todos os veráns solicita o Ministerio de Defensa. En total, estes créditos extraordinarios sumaron uns 4.500 millóns de euros só entre 2012 e 2015.
Así é o Partido Unionista Democrático (DUP), a formación norirlandesa da que depende Theresa May para formar goberno no Reino Unido. CTXT destaca que son "homófobos, machistas, antiabortistas e xenófobos", pero tamén "pragmáticos" e que apoiarán os tories renunciando á súa axenda ultra a cambio de diñeiro
CIG-Ensino denuncia o peche de centros educativos completos e o traslado de ensinanzas sen información nin negociación previa. A Consellaría de Educación comunicou na véspera do remate do curso escolar o peche de dous centros educativos -o CEIP Emilio Navasqüés en Cruceiro de Ro (Outes) e o CPI Monte Caxado (As Pontes)- e a eliminación da ESO nun centro de Ribadavia.
Xulio Ferreiro defende que a bandeira republicana da Casa Casares Quiroga está "dentro da legalidade". "É unha actuación simbólica que está relacionada co uso dese edificio", afirma trala denuncia da Delegación do Goberno