Este luns é festivo en 43 concellos galegos, entre eles A Coruña, pero tamén Ames, Carballo, Arzúa, Boiro, Culleredo, Marín, Muros, Nigrán, Narón, Oleiros, Poio, Burela ou Sarria
Chega a noite de San Xoán, tradicionalmente a noite máis curta do ano -este domingo o sol porase en Vigo ás 22:15 e o luns aparecerá ás 6:59- pero para moitos unha das máis longas, debido á xolda que se estenderá durante horas ao redor de cacharelas e sardiñas na maior parte do país. Especialmente nos 43 concellos nos que este luns 24 é festivo, encabezados pola Coruña, pero tamén Ames, Carballo, Arzúa, Boiro, Culleredo, Marín, Muros, Nigrán, Narón, Oleiros, Poio, Burela ou Sarria. E tamén nas preto de 250 parroquias dedicadas a este santo e que se distribúen por case todo o país
Preto de 250 parroquias galegas están dedicadas a este santo
Será unha noite de lume (nas cacharelas, fogueiras, lumieiras, lumaradas, laradas ou luminarias) e de arrecendo a sardiñas e a viño. E unha mañá de flores e de auga fresca. Son moitas as persoas que manteñen a tradición de recoller plantas para -co orballo da noite máis curta do ano- lavarse con elas ao día seguinte. Fiúncho, Fento macho, Codeso, Abeloura ou Herba de San Xoán, Malva, Romeu e a Herba Luísa son algunhas das especies máis empregadas, pero hai moitas outras, como destacamos o ano pasado nesta peza informativa.
Será unha noite de festa na que, ademais, acompañará o tempo seco e as temperaturas agradables. O luns subirán as máximas
Será unha noite de festa na que, ademais, acompañará o tempo seco e as temperaturas agradables, segundo a predición de Meteogalicia, que prognostica ceos despexados na metade sur e con intervalos de nubes baixas na metade norte, máis compactas no litoral. Os ventos soprarán frouxos de compoñente norte, con intervalos de moderado no litoral a partir do mediodía. As temperaturas subirán este domingo, chegando aos 30 graos en Ourense e nas Rías Baixas, con mínimas que durante a noite se moverán entre os 14 e os 17 graos na meirande parte do país.
O luns, ademais, manterase a influencia anticiclónica e entrará aire cálido en superficie, o que fará crecer as temperaturas máximas, que en Ourense chegarán aos 34 graos
Haberá preamar pola tarde do domingo (ao redor das 18 horas) e a baixamar chegará pouco despois da medianoite, ata a nova preamar que chegará ás seis e media da mañá do luns
Nas localidades litorais moitas celebracións teñen lugar nas praias. Este ano haberá preamar pola tarde do domingo (ao redor das 18 horas) e a baixamar chegará pouco despois da medianoite, comezando a subir a partir desa hora, ata a nova preamar que chegará ás seis e media da mañá do luns.
Os expertos alertan de que estes horarios favorecen a chegada de residuos ao mar pola ocupación do espazo intermareal pola noite e pola preamar das seis da mañá.
"Unha correcta política de residuos debe estar primeiramente encamiñada a reducir o volume de lixo producido, e despois, a procurar unha axeitada xestión", di ADEGA
Nesta xornada de celebración son varios os colectivos que demandan á poboación civismo e respecto ao medio natural, especialmente cando se organicen lumieiras nas praias, ante o risco de que os festexos danen a contorna. Dende as administracións locais faise fincapé nos últimos anos en promover fórmulas e iniciativas que limiten a cantidade de residuos que queda ciscada sen recoller. "Unha correcta política de residuos debe estar primeiramente encamiñada a reducir o volume de lixo producido, e despois, a procurar unha axeitada xestión" , sinalan dende ADEGA neste mesmo senso.
Entre os consellos que habitualmente realizan organizacións ecoloxistas como ADEGA están o acoutar os espazos das celebracións sobre todo nas proximidades de espazos naturais ou contornas históricas ou monumentais. Tamén evitar facer cacharelas en praias e dunas, especialmente en litorais protexidos ou de alto valor ecolóxico. Igualmente, usar recipientes (vasos, pratos) de barro ou louza, e garrafas de cristal retornables e habilitar suficientes contedores para a recollida selectiva dos refugallos.
Na Coruña o pasado ano os operarios municipais recolleron na mañá do día 24 unhas 57 toneladas de lixo fronte ás 86 toneladas do ano 2022 ou ás 117 toneladas do ano 2018
É habitual que case todos os anos o día de San Xoán comece coa imaxe de grandes cantidades de refugallos deitados nos areais. Nos últimos tempos os concellos están a poñer en marcha medidas para evitalo no posible, dende campañas informativas ata a distribución de máis contedores nos que deixar o lixo. É certo que, en xeral, a cantidade de residuos se vén reducindo. Na Coruña, por exemplo, o pasado ano os operarios municipais recolleron na mañá do día 24 unhas 57 toneladas de lixo fronte ás 86 toneladas do ano 2022 ou ás 117 toneladas do ano 2018.
![](https://praza.gal/storage/xornal/uploads/fotos/foto/576babb40507d-4734537060_1aa6797c65_o.jpg)
"Cando hai tanta xente, desgraciadamente non é suficiente que o 80% dos asistentes cumpran coas normas", sinalou o pasado ano o alcalde de Nigrán ante o incremento dos refugallos en Panxón
Porén, seguen a ser demasiadas e mesmo nalgunhas localidades se deron "pasos atrás", por exemplo en Nigrán, onde a praia de Panxón pasou de amencer sen lixo no San Xoán do ano 2022 a unha situación moito máis negativa o pasado ano, o que espertou as alertas por parte do Concello, sinalando o alcalde que "cando hai tanta xente, desgraciadamente non é suficiente que o 80% dos asistentes cumpran coas normas".
O Concello de Nigrán calcula que en praia América, entre Panxón e Lourido, se xuntaran máis de 60.000 persoas, tres veces máis que en anos anteriores.