A Xunta celebrará este mércores no Parlamento galego o décimo aniversario da aprobación por unanimidade do Plan Xeral de Normalización Lingüística (PXNL). Promove así unha celebración na Cámara para "conmemorar" os dez anos deste conxunto de medidas para favorecer o galego que cumpren unha década sen resultados e desdeñadas polo actual goberno de Núñez Feijóo, que o incumpre sistematicamente e que mesmo recoñecera que tan só era "unha referencia".

A Xunta "conmemora" este mércores no Parlamento o décimo aniversario dun PXNL incumprido e desdeñado polo goberno

Chega este acto poucos días despois de que o comité de expertos do Consello de Europa que avalían o cumprimento da Carta Europea de Linguas Rexionais e Minoritarias volvese visitar Galicia para comprobar a situación dun idioma e apañar críticas como xa fixera na súa anterior avaliación e que desta vez nin tan sequera contou coas achegas da Coordinadora de Traballadores para a Normalización, de Prolingua ou dos equipos de normalización dos centros de ensino. E chega tamén logo de que unha nova estatística do IGE certificase a perda continua de galegofalantes que xa non sitúan o idioma propio como o maioritario no país.

Para completar o cadro, os Orzamentos da Xunta confirman que as partidas lingüísticas e culturais do Goberno pasaron de superar os 150 millóns de euros en 2009 a fichar por baixo dos 65 no vindeiro 2015 e que a promoción do idioma perdeu o 70% dos seus fondos co actual Executivo.

Ás negativas estatísticas para o galego únese a perda do 70% dos fondos para a súa promoción desde que Feijóo chegou á Xunta

Colectivos en defensa da lingua, como Prolingua ou A Mesa, culpan o Executivo de Feijóo de ser o maior culpable do "retroceso" do idioma propio, a oposición reclama medidas que freen a perda de falantes e a plataforma Queremos Galego, que logrou xuntar milleiros en manifestacións históricas contra a actual política lingüística da Xunta, cre que é momento de volver encher as rúas. Este mércores, como resposta á conmemoración que a Xunta fará do PXNL, denunciará ante a Cámara "o desmantelamento do Plan e a política antiegalego que aplica este goberno". Será ás 11 e o colectivo lerá un manifesto que posteriormente será entregado a todos os grupos parlamentarios.

"Que un goberno como o actual se atreva a celebrar os dez anos dun PXNL que incumpriu abertamente é unha humillación"

"Que un goberno como o actual se atreva a celebrar os dez anos deste Plan, cando nos últimos cinco anos se dedicou a incumprilo abertamente e a desmontalo, é un acto de humillación a todas as persoas que defendemos a nosa lingua", lembra a plataforma, que censura que a Xunta "se permita celebrar coa arrogancia que a caracteriza este aniversario, cando o número de falantes de galego se reduce ano a ano ou cando na realidade cotiá o galego non é realmente lingua oficial no seu propio territorio".

"Que a Xunta retorne ao consenso"

Por todo, Queremos Galego insistirá este mércores en reclamarlle á Xunta que "retorne ao consenso de 2004 e cumpra coa obriga de potenciar a lingua galega", que asuma o "compromiso explícito e efectivo co PXNL e actuacións lexislativas que desenvolvan o contemplado nas medidas do Plan", que poña en marcha "inmediata" as medidas do devandito Plan, "coa aprobación dun calendario que comprometa fases e prazos de execución" e que "derrogue todas as disposicións legais contrarias ao PXNL, nomeadamente do decreto 79/2010 contra o galego, e as relacionadas co ensino e coa administración".

"Hai moitos remedios para impulsar e recuperar o galego, pero un deles é a implicación da sociedade"

Para Marcos Maceira, presidente d'A Mesa e voceiro de Queremos Galego, o de mañá será un acto "sinxelo e reivindicativo", que debería seguir cunha maior mobilización social, máis aínda tras as últimas e negativas novas para o galego, entre estatísticas e orzamentos recortados, e no medio dunha crise que, en moitos casos, agocha outros temas. "Hai moitos remedios para impulsar e recuperar o galego, pero un deles é a implicación da sociedade, que debe estar activa para conseguir repor o idioma no sitio que lle corresponde ata que sexa unha lingua oficial de facto, na realidade", di.

O portavoz de Queremos Galego cre que "se hai algo claro" é que "a situación da lingua tamén é un reflexo do que acontece na sociedade". "Non hai ningún país do mundo que avance e lle dea as costas á súa lingua", insiste quen cre que a diminución nos Orzamentos da Xunta para a promoción do galego "evidencian unha falta de respecto polo idioma e polo país tamén".

"A lingua é un elemento de identidade, unha marca de calidade e de prestixio que tamén xera movemento económico pero que o Goberno galego ignora", engade Maceira, que pon exemplos como a consecución do Android en galego do que pode facer unha cidadanía activa ante o desleixo da Administraicón. "Demostra que movéndose e presionando, acábanse conseguindo cousas; mobilizarse pola lingua é máis necesario ca nunca", asegura, ao tempo que se pregunta (e responde) que sería do idioma co apoio institucional que merece e que debe ter.

"Mobilizarse pola lingua é máis necesario ca nunca", di Queremos Galego

"A situación sería moi diferente porque estaría apoiado por quen ten a obriga de facelo; a lingua tería moita máis presenza e tería avanzado moito tan só con que se cumprisen ou se puxesen prazos concretos para cumprir o PXNL; desde logo, non habería esta sangría de galegoflanates e a consideración do idioma sería moito mellor", conclúe quen insiste na necesidade de pelexar "por unha lingua normalizada".