A Xunta di agora que dará instrucións para non volver revelar a empresas datos persoais de quen lle fai peticións de transparencia

O vicepresidente económico da Xunta, Francisco Conde, e a directora xeral de Planificación Enerxética, Paula Uría, con representantes do sector eólico CC-BY-SA Xunta de Galicia

Unha directora xeral cualifica de “incidente puntual” o que un departamento subordinado admitiu que se fai “sempre” e asegura que vai “evitar no futuro este tipo de incidentes”

A nova directora xeral de Planificación Enerxética da Xunta, Paula Uría, admite que o seu departamento, ata novembro en mans do histórico dirixente popular Ángel Bernardo Tahoces, revelou a unha empresa eólica datos persoais dun cidadán que formulou á administración unha petición de transparencia sobre o impacto ambiental dun parque eólico, pero asegura agora que “foi un feito excepcional” e “puntual” xa que “non é o proceder habitual desta unidade”. 

Desminte así a outro cargo público subordinado, a persoa responsable da xefatura de servizo de Enerxías Renovables e Eficiencia Enerxética, que confirmara cun “sempre o facemos” que o seu departamento trasladara á empresa non só o contido da petición do cidadán senón o mesmo impreso de solicitude asinado con nome, DNI, enderezo, teléfono e correo electrónico, modo de proceder revelado o pasado decembro por Praza.gal con probas de que sería máis xeneralizado. Agora, malia consideralo un feito “puntual”, a directora xeral asegura que “daranse as instrucións oportunas co obxecto de evitar no futuro este tipo de incidentes”.

Informe da directora xeral de Planificación Enerxética sobre a revelación de datos persoais a empresas eólicas CC-BY-SA Praza Pública

O Goberno galego sinte “as molestias ocasionadas” en resposta unha queixa formal que se lle formulou e tras un requirimento por incumprir os prazos do seu decreto de atención á cidadanía

O recoñecemento por parte da alto cargo do Goberno galego da cesión de datos persoais a unha empresa eólica prodúcese despois de que o departamento de comunicación da vicepresidencia económica da que depende rexeitase dar ningún tipo de resposta á pregunta Praza.gal sobre o ocorrido. Pola contra, agora é a directora xeral a obrigada a contestar a unha queixa oficial formulada ao amparo do decreto que regula a atención á cidadanía por parte da Xunta, que establece que a Oficina de Defensa das Persoas Usuarias dos Servizos Públicos da Xunta debe dar resposta ás mesmas “no prazo máis breve posible, que non excederá un mes desde a recepción da suxestión ou queixa”. 

Presentada a queixa o 7 de decembro, esa Oficina de Defensa da cidadanía, a cargo do director xeral de Avaliación e Reforma Administrativa, Jesús Oitavén, non respondeu e dez días despois de superado o prazo, o 18 de xaneiro, formulóuselle un requirimento reclamando o cumprimento da normativa. Finalmente o 15 de febreiro, máis do dobre do tempo contemplado no decreto, respondeu anexando un informe sobre os feitos denunciados que solicitou á Secretaría Xeral da Consellería de Economía, dependente da vicepresidencia económica da Xunta, e que esta emitiu mes e medio máis tarde do prazo que a obrigaba.

Ese informe de resposta á queixa asínao a directora xeral de Planificación Enerxética, Paula Uría, no cargo desde finais de novembro, cando substituíu ao histórico Ángel Bernardo Tahoces, no mesmo posto desde 2009 e con varias polémicas ás súas costas por dificultar a transparencia do seu departamento.

No seu informe, Uría di que “revisadas as tramitacións feitas nesta dirección xeral cando se produce o traslado a terceiros da solicitude” -o trámite polo que se consulta a posibles afectados por unha petición de transparencia que se lle formule á administración-, “comprobouse que sempre se leva a cabo a disociación dos datos persoais, polo que pódeselle indicar que a comunicación da solicitude íntegra foi un feito excepcional, e que non é o proceder habitual desta unidade”. O informe engade que “no entanto, daranse as instrucións oportunas co obxecto de evitar no futuro este tipo de incidentes”. 

Información sobre a protección de datos persoais do formulario de solicitudes de transparencia no que non se contempla a súa cesión a empresas alleas á Xunta CC-BY-SA Praza Pública

Pola contra, cando un xornalista de Praza.gal pediu no seu momento explicacións á xefatura de servizo responsable do trámite de consulta a terceiros, a súa explicación foi distinta: “Nós o que non podemos é redactar o que se supón que se nos está pedindo, o que facemos é en todo caso mandar o mesmo escrito”. Escrito íntegro con todos os datos persoais que posteriormente a empresa anexou nun correo electrónico que dirixiu ao solicitante de transparencia para inquirirlle o motivo da súa petición á Xunta.

Agora, xunto co informe da directora xeral de Planificación Enerxética no que admite o ocorrido e di traballar para evitalo no futuro, o director xeral de Avaliación e Reforma Administrativa encargado de responder as queixas da cidadanía di sentir “as molestias ocasionadas e agradecemos a súa colaboración por canto nos permite coñecer as áreas susceptibles de mellora nas que a Xunta de Galicia debe centrar os esforzos”.

En xuño o Tribunal Superior evidenciou que outra empresa enerxética tamén coñecía datos persoais dun solicitante de transparencia

Antes deste caso unha sentenza do Tribunal Superior de Xustiza de Galicia referente a outra petición de transparencia sobre outro parque eólico distinto xa deixaba entrever o proceder do Goberno galego. Naquela resolución do pasado 19 de xuño o TSXG daba a razón á Xunta na súa decisión de facilitar a un xornalista de Praza.gal a información que solicitara fronte á negativa da empresa propietaria do parque eólico e facíao rexeitando as súas alegacións indicando que “o feito de que o solicitante pretenda incorporalos [os datos] a unha noticia periodística está amparado polo dereito á liberdade de información”. A sentenza evidenciaba así que a empresa era coñecedora da condición de xornalista da persoa que solicitaba a información cando nin ela nin o seu medio de comunicación -as peticións de transparencia son da cidadanía individualmente, non de organizacións- compareceran na causa xudicial entre a enerxética e a Xunta sobre a pertinencia ou non de facer públicos os datos.

Sentenza do TSXG que evidencia que outra empresa eólica tamén coñecía datos persoais dun solicitante de transparencia © Norvento - Praza Pública

A Xunta tamén divulgou, en aplicación da Lei de Transparencia, nomes de menores de idade aos que pagaba tratamentos médicos

Non é a primeira vez que na súa aplicación da Lei de Transparencia a Xunta divulga datos persoais. Ao comezo da vixencia da mesma a Consellería de Política Social fixo públicos en internet os nomes e apelidos de menores de idade aos que pagaba distintos tipos de tratamentos médicos. Praza.gal detectou esas publicacións na web de transparencia da Xunta e, tras alertar á consellería, agardou a que esta borrase os nomes antes de publicar unha información ao respecto na que o departamento que daquela dirixía José Manuel Rey Varela admitía o sucedido como un “erro”.

Por outra banda, o procedemento de alegacións de terceiros nas solicitudes de transparencia dirixidas á Xunta tamén deixou en evidencia en 2018, a conta dunha petición dun convenio do Sergas cunha multinacional, que o Goberno galego denega esas solicitudes mesmo cando a empresa implicada non pon problemas para facilitar a información. Similar procedemento de ocultar o que un terceiro non ten problemas en desvelar seguiu a Xunta ao borrar parte do convenio que asinou co Ministerio de Defensa para crear unha base de probas de drons no aeródromo de Rozas, acordo que o ministerio publicou íntegro en 2015 no seu boletín oficial.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.