A Xunta di que esixe a devolución da Risga a centos de persoas por culpa do Estado mentres a mantén incompatible co IMV

Fabiola García, conselleira de Política Social, e Arturo Parrado, director xeral de Inclusión Social CC-BY-SA Xunta

Hemeroteca

Durante as últimas semanas, persoas perceptoras da Risga (Renda de Inclusión Social de Galicia) están a recibir cartas nas que a Xunta lles reclama a devolución de todas as mensualidades cobradas desde que solicitaron o Ingreso Mínimo Vital (IMV) que o Goberno central instaurou o pasado mes de xuño. 

A Xunta reclama a persoas sen recursos que devolvan varios meses da Risga ao mantela incompatible co Ingreso Mínimo Vital

Ata perto de 4.000 euros son reclamados a algunha persoa, segundo denunciaran en Praza.gal varias entidades sociais, desde o pasado mes de abril. Só días despois de que o Estado comezase a ingresar dunha vez e de maneira retroactiva todos os meses pendentes, a Xunta solicita a devolución de todo o cobrado da renda autonómica durante os meses nos que se percibiron ambas prestacións, por seren incompatibles.

Agora, a Xunta sinala o Goberno central, ao que pide que estableza “vías de coordinación real” para "superar as eivas do IMV". Así o demandou a conselleira de Política Social, Fabiola García, tras participar este martes nunha reunión do Consello Territorial de Servizos Sociais, acompañada polo director xeral de Inclusión Social, Arturo Parrado. 

A Xunta recoñece que está a reclamar a devolución de mensualidades da renda autonómica, unha situación que afecta xa unhas 2.000 persoas, culpa o Executivo central e pide un "mecanismo de compensación para evitar que as persoas que transitaron da Risga ao IMV se vexan prexudicadas a causa dos meses nos que compatibilizaron ambas prestacións, polos atrasos na concesión do IMV". 

Política Social pide ao Estado "un mecanismo de compensación para evitar que as persoas que transitaron da Risga ao IMV se vexan prexudicadas"

Parrado xustifica que a Administración galega seguise concedendo a Risga a quen xa solicitara o IMV en que se fixo "para axudar estas persoas a saír adiante" e porque "tardaron meses en ver resolta a súa solicitude". Pero nada di da incompatibilidade da renda autonómica co Ingreso Mínimo Vital, que a Xunta mantén malia que abonda unha reforma lexislativa que permitiría compaxinar ambas axudas, tal e como se aplica en moitas outras comunidades autónomas e tal e como reclaman entidades sociais e formacións políticas. 

Porque o Goberno de España concibiu o IMV como "compatible" coas rendas de inclusión ou de garantía de ingresos xa existentes nas comunidades autónomas. Aínda que ambas prestacións son diferentes en contías e condicións, unha parte da poboación á que se dirixen é coincidente e, segundo dixera o Ministerio de Inclusión e a Vicepresidencia de Dereitos Sociais, a intención é que puidesen "complementarse". Pero isto non sucede en Galicia e non sucederá ata que o Parlamento tramite unha reforma da lei de inclusión social. Constituída a nova Cámara lexislativa desde o pasado agosto, non hai traza aínda de mudanza ningunha. 

Para que a compatibilidade fose posible, debería tramitarse unha reforma da norma da que, dende 2013, depende a aplicación da Risga, existente dende 1991. Dende 2019 -con máis de cinco anos de atraso sobre o estipulado na devandita lei-, a renda de inclusión está tamén regulada por un decreto de seu. Ambas normas fixan o réxime de incompatibilidades da Risga e considerána incompatible "coas pensións non contributivas ou con calquera outra prestación ou pensión de importe igual ou superior ás ditas pensións".

Entidades sociais reclaman unha mellor xestión da Risga © EnMarea

O Goberno central concibiu o IMV como "compatible" coa Risga, pero en Galicia só sería posible de reformarse a lei de inclusión social

Dado que o mínimo de renda que garante o ingreso mínimo vital é exactamente o mesmo que o das pensións non contributivas (PNC), 5.538 euros anuais para unha persoa adulta soa, esta disposición converte de facto a Risga en incompatible co ingreso mínimo vital. Así, aínda que a regulación estatal considere o IMV compatible cunha prestación como a Risga, a regulación da Risga si a fai incompatible co IMV. Para superar este atranco cómpre que o Goberno galego ou os grupos parlamentarios impulsen unha reforma lexislativa e que o Parlamento a aprobe.

Nada se sabe desta opción polo momento. Mentres, a Xunta pide ao Goberno central que a tramitación do IMV sexa "áxil, accesible e eficaz" e reclama o traspaso da súa xestión ás comunidades autónomas. Ademais, a Consellería de Política Social denuncia que "a actual situación, derivada da accidentada posta en marcha do IMV e das sucesivas modificacións que se introduciron na súa normativa durante o último ano, está xerando saturación nos servizos sociais básicos". E reclama que o Estado incremente o seu financiamento para facer fronte ao número crecente de solicitudes. 

Despece

  • O Colexio de Educadoras Sociais pide á Xunta que non reclame a devolución da Risga e cumpra cos dereitos sociais das persoas vulnerables

    A ODS de Coia denuncia habitualmente os problemas de xestión da RISGA Dominio Público ODS-Coia

    O Colexio de Educadoras e Educadores Sociais de Galicia (Ceesg) vén de remitir un escrito á Xunta de Galicia no que, en atención á Lei de Inclusión Social galega, solicítalle que "reverta as accións iniciadas nos últimos días de reclamación da devolución da prestación da Risga ás persoas beneficiarias por considerar, desde o ente autonómico, que a súa percepción é incompatible co Ingreso Mínimo Vital (IMV)".

    O Ceesg cre "incongruente" pedir a devolución da Risga por "incumprir os dereitos sociais das persoas vulnerables que establece a propia Lei de Inclusión"

    O Ceesg cualifica de “incongruente” unha práctica que, considera, “incumpre os dereitos sociais das persoas en situación de vulnerabilidade que establece a propia Lei de Inclusión Social de Galicia”, e chama a Xunta “a salvagardar o benestar da cidadanía”, particularmente das persoas beneficiarias da Risga revertendo unha circunstancia que vén provocada, a ollos do Colexio, “pola ausencia de coordinación efectiva entre a administración estatal e autonómica”.

    "A Xunta é coñecedora das persoas que reciben o IMV, como así se amosa nas comunicacións que as perceptoras están a recibir"

    Así, na súa exposición, o Colexio salienta que Lei 10/2013 de Inclusión Social, no seu artigo 5, establece como principios xerais de aplicación e interpretación, entre outros puntos, a integración, coordinación e a transversalidade, explicitando que as políticas públicas da Xunta “se deseñarán tendo en conta o seu impacto na inclusión social”; ademais de “procurar a compensación “de situacións consolidadas de marxinación e déficit de oportunidades de grupos e colectivos sociais”. Con todo, o propio artigo lembra que os recursos públicos que se destinen para facer efectivos estes dereitos farán posible unha mellora das oportunidades reais de inclusión social e laboral das beneficiarias.

    O Ceesg lembra que na mesma lei, no seu artigo 42.2, esta recolle expresamente que, “cando por causas non imputables á persoa beneficiaria se perciban cantidades ás que non se tivese dereito, aplicarase a compensación anteriormente citada como procedemento ordinario de regularización”. Porén, o Colexio considera que non cabe incumprimento das obrigas previstas na lei, dado que a Xunta de Galicia "é coñecedora das persoas que reciben o IMV, como así se amosa nas comunicacións que as perceptoras están a recibir e nas que se lles solicita a devolución do percibido".

  • Miguel Pardo

    Miguel Pardo

    Entre A Coruña e o Ortegal. Antes en La Opinión, Depor Sport, L-V ou Xornal de Galicia. Co-autor de La imagen del mundo árabe y musulmán en la prensa española (2010, Fundación Tres Culturas)

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza