A Xunta recupera no seu “Pacto de Estado por Ferrol” a promesa dunha autovía coa Mariña que incumpre desde hai unha década

Feijóo na inauguración en 2013 da circunvalación de Ortigueira, a 50 quilómetros de Ferrol, un dos dous únicos treitos da vía da Costa Norte prometida en 2009 que agora recupera para o seu Pacto de Estado por Ferrol CC-BY-SA Xunta de Galicia

En 2009 o PP prometeu que en 2012 poría en servizo unha autovía ata San Cibrao, pero dos 80 quilómetros só rematou 16 de corredor cun carril por sentido do que priorizou treitos afastados de Ferrol

En 2009 o programa electoral co que Alberto Núñez Feijóo chegou á presidencia da Xunta prometía textualmente unha “Autovía do Norte Ferrol-San Cibrao (posta en servizo 2012)”. Unha década despois o que hai en servizo nos 80 quilómetros que separan as dúas localidades son dous treitos illados afastados de Ferrol, en Ortigueira e Xove, de estrada de novo trazado cun carril por sentido que suman 16 quilómetros, e ningún outro punto en obras. Porén, a infraestrutura é posta agora como “exemplo” pola Xunta para reclamar ao Estado o que o presidente bautizou a pasada semana como “Pacto de Estado por Ferrol”.

A conselleira de Infraestruturas, Ethel Vázquez, nunha parada de autobús de Ferrolterra e programa electoral do PP de 2009 prometendo para 2012 unha "Autovía do Norte Ferrol-San Cibrao" CC-BY-SA Praza Pública

O Goberno galego pon a vía da Costa Norte como “exemplo” das melloras nas infraestruturas que reclama ao Estado para Ferrolterra

Tras lanzar Feijóo a reclamación dun acordo de todas as administracións para a reactivación de Ferrol e a súa comarca, nos últimos días o seu vicepresidente económico, Francisco Conde, está a reunirse con representantes políticos, empresariais ou sindicais da zona. Tras o encontro deste martes con empresarios -novamente todos homes-, a Xunta salientou que unha das prioridades da Xunta é “desenvolver unha rede de infraestruturas que permita achegar Ferrol ao resto de grandes nodos da actividade industrial tanto de Galicia como do noroeste peninsular”, entre as que puxo en primeiro lugar a mellora da conexión ferroviaria da cidade coa Coruña e o resto do Corredor Atlántico de mercadorías. 

E xunto ao tren, “o Pacto de Estado por Ferrol debería incluír o desenvolvemento dun plan de investimento, conservación, reparación e mellora de vías de comunicación tanto de titularidade da Xunta como doutras administracións. Un exemplo sería a vía de alta capacidade (VAC) da Costa Norte que xa está recollida nos orzamentos da Xunta cunha partida de 5,5M€”, salienta o Goberno galego sobre unha contía que aínda non permitirá iniciar ningunha nova obra.

A realidade é que nos últimos anos a Xunta foi pospoñendo a autovía, xa recortada a un carril por sentido, co recurso de encargar novos estudos para treitos que xa contaban con eles, como a decisión de analizar agora unha posible ponte sobre a ría de Viveiro fronte ao trazado inicialmente previsto polo interior. A cambio destas demoras, o Goberno galego vén publicitando todo tipo de actuacións de mantemento ou mellora da seguridade das estradas convencionais da zona.

Reunión do vicepresidente económico da Xunta, Francisco Conde, con empresarios de Ferrolterra CC-BY-SA Xunta de Galicia

Á espera do que poida dar de si o Pacto de Estado por Ferrol, doce anos despois da promesa electoral a autovía son dous treitos duns 8 quilómetros cada un: o máis próximo á cidade a uns 50 quilómetros, a circunvalación de Ortigueira, aberta en 2013, e o outro entre Viveiro e San Cibrao, licitado polo bipartito e inaugurado en 2017 con tres anos e medio de atraso. 

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.