O xulgado do Penal de Zamora que levaba o seu caso inhíbese ante o alto tribunal ao constatar "a condición de aforado" do popular

O xulgado do Penal 1 de Zamora que levaba ata agora o caso por delito contra a seguridade viaria contra José Manuel Baltar por conducir un coche oficial da Deputación de Ourense a 215 quilómetros por hora vén de facer público un auto co que se inhibe en favor do Tribunal Supremo. A xuíza constata "a condición de aforado" de Baltar, que deixou a presidencia da Deputación de Ourense o pasado 17 de xullo e dez días despois foi designado polo PP senador en representación do Parlamento de Galicia. 

A finais de abril eldiario.es desvelou que Baltar fora interceptado pola Garda Civil circulando nas proximidades de Pobra de Seabra a 215 quilómetros por hora, unha actuación que despois se soubo que non era novidosa.

Citado inicialmente para un xuízo rápido nun xulgado de Pobra de Seabra o 9 de maio, Baltar logrouno adiar a despois das eleccións municipais do 28 de maio ao mudar o xuízo rápido por outro ordinario, que pasou a depender dun xulgado do Penal de Zamora. Pero a nova citación, para tres días despois dos comicios, volveu ser adiada por unha folga de persoal da xustiza.

Baltar logrou adiar varias veces o seu xuízo rápido fixado inicialmente para o 9 de maio e o 17 de agosto tomou posesión como senador

Finalmente os resultados das eleccións municipais non permitiron ao PP controlar en solitario a Deputación de Ourense e recorreu novamente ao apoio da Democracia Ourensana de Gonzalo Pérez Jácome, nunha operación que supuxo a saída de Baltar da presidencia provincial. Esa marcha concretouse o 17 de xullo, pero apenas dez días despois o PP facíao senador por designación do Parlamento de Galicia. E o 17 de agosto Baltar tomaba posesión como senador.

Ante esa situación, o xulgado de Zamora pediu ao Senado que confirmase o status de Baltar e o 29 de agosto recibiu un certificado que "acredita a condición de senador" de Baltar e polo tanto a súa "condición de aforado". O xulgado de Zamora lembra diversas resolucións xudiciais previas por outros casos con persoas aforadas e constata que resulta "polo tanto competente de forma sobrevida para o xuízo rápido a Sala Segunda do Tribunal Supremo", ante a que se inhibe.