"Unidade total". Foi a cerna do discurso do secretario xeral do PSdeG no primeiro comité provincial do partido en Lugo tras o último proceso congresual, no que o tamén presidente da Deputación e alcalde de Monforte, José Tomé, revalidou a secretaría xeral tras unhas primarias con máis tensión que en procesos anteriores.
O líder do PSdeG apela no comité provincial do partido en Lugo a "acadar a velocidade de cruceiro" en "contraste cun PP que só aparece para a foto" e "usa a provincia como decorado electoral para despois abandonala"
"Da unidade nacen os proxectos fortes e medran os proxectos que perduran", resalta José Ramón Gómez Besteiro, quen na que foi a súa primeira casa política -o actual líder galego da formación presidiu a Deputación e encabezou o partido na provincia- advertiu de que, pasados os procesos internos, é "imprescindible acadar velocidade de cruceiro" pensando nos "obxectivos políticos da esquerda progresista" nas municipais de 2027. E facelo "en contraste cun PP que só aparece para a foto" e "usa a provincia como decorado electoral para despois abandonala".
Dese "traballo colectivo e continuado", advirte Besteiro, chegaron "os grandes avances do socialismo en Lugo". Dende o "histórico acceso á Deputación", poñendo fin ao cacharrismo en 2007, ata a "consolidación dun proxecto provincial estable" ou múltiples gobernos en vilas e cidades. "Temos moitos exemplos de boa xestión municipal, con concellos pequenos que fan un traballo admirable e cidades que avanzan con proxectos solventes; debemos presumir do que facemos, é o mellor aval ante a cidadanía", mantén.
Besteiro presenta como paradigma da política dos populares cara a Lugo o seu apoio a Altri, "un proxecto que non é bo para esta provincia nin para a economía do país"
"Onde gobernamos debemos demostrar utilidade e onde non gobernamos, explicar con claridade o noso proxecto" porque "unidos somos unha forza enorme", reitera Besteiro, quen coida que neste contexto cómpre evidenciaren "décadas de abandono" dos concellos lucenses por parte do PP no que atinxe á Xunta. "Ausencia de vivenda pública, retrocesos sanitarios, falta de atención á dependencia, inacción forestal, nula política industrial... O PP non planifica, non inviste e non defende esta provincia".
Neste sentido, presenta como paradigma da política dos populares cara a Lugo o "proxecto absolutamente falido de Altri". O plan para construír esta factoría "non conta con garantías ambientais nin económicas" e por iso "non dispón das axudas europeas prometidas" nin "da conexión eléctrica necesaria". Ao contrario do sinalado polo PP e pola Xunta, salienta, "Lugo non queda desenchufado" dos plans do Estado para reforzar as conexións eléctricas das industrias. "Quen queda desenchufado é Altri, un proxecto que non é bo nin para esta provincia nin par a economía do país", conclúe.
