O presidente critica que Pontón nunca xestionase persoalmente unha administración e presenta a Besteiro como "home anuncio", mentres que a oposición di agardar só a que o PP estatal dea permiso para a convocatoria electoral

Tras a aprobación este martes dos Orzamentos da Xunta para 2024 este mércores o último Pleno do ano no Parlamento viviu a sesión de control ao Goberno galego, que BNG e PSdeG presentaron como a derradeira da lexislatura. Á espera de que o presidente Rueda anuncie a data en que se celebrarán as próximas eleccións galegas, que o seu propio equipo considera inminentes tras a entrada en vigor das novas contas públicas, nacionalistas e socialistas amosáronse preparados para gobernar Galicia, mentres que o presidente presentou os seus candidatos como sen experiencia de goberno no caso de Ana Pontón e como "home anuncio" no de José Ramón Gómez Besteiro. Fronte a eles Rueda ofreceu "humildade e eficacia".

Tanto a portavoz nacional do BNG, Ana Pontón, como o portavoz parlamentario do PSdeG, Luis Álvarez, centraron a sesión de control en facer balance da década e media de gobernos do PP. Os dous presentaron unha Galicia peor que a colleu en 2009 Alberto Núñez Feijóo e aseguraron que as súas respectivas formacións están preparadas para goberar. Porén, Rueda asegurou o contrario e, evitando referencias electorais, lanzou novos anuncios, como que a Xunta prorrogará a partir do 1 de xaneiro os descontos no transporte interurbano da súa competencia á espera do que decida o Goberno de España ao respecto.

Nacionalistas e socialistas aseguran estar preparados para gobernar mentres o popular apela a "seguir traballando con sentidiño para ser unha illa de estabilidade".

Pontón comezou a súa intervención asegurando que "esta é seguramente a ultima sesión de control da lexislatura" e lamentou que Rueda "déixanos unha Galicia peor que a que atopou". "A maioría dos galegos e galegas non pode chegar a fin de mes", dixo a nacionalista, ao que o presidente respondeu que ese non sería o caso da propia Pontón, á que criticou que, pola contra, "non xestionou nunca un euro público".

Porén, a nacionalista lembrou que "todos e todas estamos aquí elixidos por galegos e galegas que pensan diferente" e amosou o seu convencemento de que nas próximas eleccións decidirán abrir "unha nova etapa".

Pontón tamén asegurou na súa intervención que, aínda que prevé que as eleccións sexa inminentes, estas serán "cando Feijóo o mande", xa que ve aos populares galegos "teledirixidos desde a rúa Génova". Similar consideración fixo o socialista Álvarez, para quen "Ayuso chamará a Feijóo para dicir que se convoquen eleccións en Galicia, e Feijóo chamarao a vostede".

Nas súas respostas a Álvarez, e ao igual que fixo con Pontón, o presidente Rueda cargou contra o candidato socialista, Besteiro, no seu caso presentándoo como "home anuncio". Porén, Álvarez asegurou que "Besteiro consegue máis cousas para a nosa terra en meses que vostedes en anos". O socialista augurou tamén que "xa é hora de que o PP perda para que Galicia gañe" e emprazou a Rueda: "Vémonos nas urnas".

Á espera desas eleccións Rueda asegurou que vai "seguir traballando con sentidiño para ser unha illa de estabilidade".