A titular de Igualdade e o de Medio Rural desprázanse a 15 quilómetros de San Caetano para escenificar a sinatura de medidas xa en marcha
A Xunta incluíu este mércores na súa axenda pública un acto no pazo de Quián, en Boqueixón, a 15 quilómetros da sede de San Caetano, para escenificar a sinatura dun “acordo de colaboración” entre dúas consellerías do mesmo Goberno galego, a de Emprego e Igualdade e a de Medio Rural, “para desenvolver medidas previstas no Pacto de Estado contra a Violencia de Xénero”, aprobado en 2017 por todo tipo de administracións.
![](https://praza.gal/storage/uploads/210707-mr-xenero-2-710a7b6.jpeg)
Fronte á escenificación da sinatura deste mércores, a propia Xunta salientou que este non é o primeiro acordo entre as dúas consellerías para o mesmo fin senón que "é o terceiro ano que o asinamos" e supón “renovar” un compromiso de loita conxunta dos dous departamentos contra a violencia de xénero que cuantifica en “250.000 euros, máis do dobre con respecto ao acordo asinado en 2019”.
“Aunamos esforzos por terceiro ano consecutivo co obxectivo de mellorar a prevención da violencia sobre as mulleres do rural”, di a conselleira de Emprego e Igualdade
Ata o pazo de Quián, que a Xunta presenta como "espello do rural", desprazáronse a conselleira de Emprego e Igualdade, María Jesús Lorenzana, o conselleiro de Medio Rural, José González, a directora xeral da Axencia Galega de Desenvolvemento Rural (Agader), Inés Santé, e a secretaria xeral de Igualdade, Susana López Abella. “Aunamos esforzos por terceiro ano consecutivo co obxectivo de mellorar a prevención da violencia sobre as mulleres do rural”, dixo a conselleira de Igualdade.