O presidente considera as críticas de BNG e PSdeG unha "falta de respecto" ás persoas que agradeceron entre bágoas á Xunta as axudas recibidas
O presidente da Xunta, Alfonso Rueda, defendeu este luns o acto de balance do último ano de goberno que celebrou o pasado martes na Cidade da Cultura con persoas beneficiarias de axudas sociais que agradeceron, mesmo entre bágoas, esas prestacións públicas. Rueda tamén dixo non saber canto custou o acto, cun rechamante despregue audiovisual e "un fabuloso petisco" para os invitados.
Ante as críticas de BNG e PSdeG ao acto, que cualificaron como "franquista" ou "espectáculo de vasalaxe", o presidente asegurou que "as persoas que estaban alí estaban voluntariamente". Rueda mesmo considerou as críticas da oposición unha "falta de respecto a esas persoas polas cousas que se daban a entender".
"Non entendo moi ben que é o que lle molestou á oposición", di Rueda ante as críticas de BNG e PSdeG
O presidente defendeu que o acto fose realizado pola Xunta e non polo PPdeG porque era un "acto para balance do que fixo o goberno". "Non entendo moi ben que é o que lle molestou á oposición", dixo, para criticar tamén que nacionalistas e socialistas non acudisen ao acto.
Rueda foi preguntado tamén por canto custou o acto, pero o presidente esquivou o asunto. Dixo non sabelo e asegurou que "se se pide, se facilitará" o dato. BNG e PSdeG xa o pediron vía parlamentaria, onde a resposta pode tardar varios meses en chegar e facelo de xeito ambiguo ou non detallado.
