Rueda asegura que as persoas participantes no acto denominado "Estilo Galicia", presentado como un programa de televisión de testemuñas, "podían dicir o que lles petara"

Un ano despois da toma de posesión do Goberno de Alfonso Rueda a Xunta organizou este martes na Cidade da Cultura un acto de balance titulado "Estilo Galicia". Durante o mesmo, con música épica e dirixido por unha presentadora con palabras grandilocuentes como un programa de televisión de testemuñas, varias persoas agradeceron, mesmo entre bágoas, as axudas sociais recibidas da Xunta. 

Polo escenario foron pasando un estudante de último ano de Medicina que asegurou que puido facer a carreira grazas á gratuidade das matrículas universitarias implantadas no último curso. Unha muller que acaba de recibir un piso de protección social. Outra muller que coida da súa nai e pode descansar algo "grazas" ao Bono Social que obtivo da Xunta. Ou un home que tras un accidente laboral sufriu un ictus e entre bágoas agradeceu tamén a axuda que recibe. Mentres, a presentadora salientaba que grazas á Xunta o home pode ser coidado na súa casa porque "non quería marchar a unha marabillosa residencia" como as que hai en Galicia.

Tras as testemuñas, a condutora do acto asegurou que todo isto en Galicia "conséguese en equipo", e presentou e invitou ao escenario aos conselleiros e conselleiras e o presidente Rueda, "o equipo", recibidos entre aplausos. Durante a súa intervención, que serviu de peche ao acto, o presidente eloxiou "o ben" que o fixo a presentadora e asegurou que todos os que participaran nel "podían dicir o que lles petara". A presentadora deu por rematado o acto informando aos invitados de que habería a continuación "un fabuloso petisco".

Á marxe deste acto, a axenda pública da Xunta deste martes laborable estivo dominada por actos relixiosos. Dos sete actos previstos, catro consistiron en asistir a procesións de Semana Santa.