O presidente lembra que tanto o Eixo Atlántico entre A Coruña e Vigo como un treito xa aberto do AVE a Madrid seguen operando aínda sen o sistema propio da alta velocidade co que Transportes quere abrir xa de inicio o resto da liña coa Meseta
O presidente da Xunta desmentiu este xoves que suxerise ao ministro de Transportes, José Luis Ábalos, como asegurou este o martes, poñer en servizo o AVE coa Meseta cun sistema de seguridade inferior ao propio da alta velocidade para así adiantar a súa inauguración. Segundo Feijóo, o que fixo foi preguntar a Ábalos con que sistema prevía o ministerio abrir a liña, e lembrou que tanto o Eixo Atlántico entre A Coruña e Vigo como un treito xa en servizo do AVE a Madrid foron abertos co sistema de seguridade inferior e seguen operando aínda con el.
No accidente de Angrois o sistema de seguridade ferroviaria propio do AVE, o ERTMS que controla en todo momento a velocidade dos trens, estaba desconectado porque fallaba e o sistema convencional de respaldo, o ASFA que segundo Ábalos foi suxerido por Feijóo para abrir canto antes a liña coa Meseta, non estaba configurado para evitar o exceso de velocidade do Alvia. As probas pendentes de realizar do sistema ERTMS son o que impide agora que o Ministerio de Transportes poida dar unha data concreta para a posta en servizo do AVE coa Meseta, cuxas obras están a piques de rematar.
“Consultar se os modelos de seguridade ASFA e ERTMS son seguros, supoño que será o mínimo que podemos preguntar”, di Feijóo
Cando foi preguntado este xoves na rolda de prensa posterior ao Consello da Xunta pola acusación do ministro, Feijóo respondeu poñendo en dúbida a credibilidade de Ábalos, co que dixo que ten unha “relación persoal boa”. Tivo que ser repreguntado sobre se desmentía ou non o dito polo ministro para que Feijóo así o fixese “categoricamente”. Porén, tamén se lle preguntou que puido dicirlle ao ministro para que este interpretase así as súas palabras, ao que Feijóo respondeu admitindo que consultara a Ábalos “se o sistema neste momento operativo no Eixo Atlántico [o ASFA] é o que se pode poñer inicialmente no tren a Galicia”, pregunta que o propio presidente considera “responsable”. “A resposta foi que querían [abrir a liña con] ERTMS e ASFA simultaneamente, e acabou aí o asunto”, asegurou Feijóo, para quen “consultar se os modelos de seguridade ASFA e ERTMS son seguros, supoño que será o mínimo que podemos preguntar”.
Tras o accidente de Angrois mellorouse a normativa do ASFA para que agora si poida evitar un exceso de velocidade como o daquel accidente
Tanto o Eixo Atlántico entre A Coruña e Vigo como o treito Olmedo-Zamora da liña a Madrid foron abertos os dous en 2015 sendo ministra a popular Ana Pastor, nos dous casos só co sistema ASFA á espera de que cando se remate o resto da liña coa Meseta se active tamén o ERTMS. Porén, tras o accidente de Angrois modificouse a normativa sobre o ASFA e mellorouse a súa seguridade en más dun cento de puntos de toda España, dez deles no Eixo Atlántico, para que o sistema xa si poida evitar un exceso de velocidade como o do accidente aínda que non haxa ERTMS.
