Na mañá do pasado 10 de febreiro o lehendakari vasco, Íñigo Urkullu, fixo oficial o adianto das eleccións ao Parlamento de Euskadi para o 5 de abril. Escasas horas despois, Alberto Núñez Feijóo reunía de urxencia o Consello da Xunta e ratificaba que, por terceira vez, secundaba a data fixada polo xefe do Executivo vasco para chamar ás urnas en Galicia. Aquela cita tivo que ser cancelada polo coronavirus e agora, despois de que unha emenda introducida polo PNV ao estado de alarma abriu a porta a activar xa outros comicios, todo apunta a que Feijóo se dispón a facer o propio unha vez máis.
O actual presidente da Xunta e líder do PPdeG "comparte ao cen por cen" a posibilidade de reducir á metade a campaña electoral, suxerida polo PNV para Euskadi
O actual presidente da Xunta e líder do PPdeG xa evidenciou o pasado xoves ante o resto de líderes políticos de Galicia -nesta ocasión, excepcionalmente, tiña que "ouvir" o resto de formacións antes de chamar ás urnas- a súa intención de que os comicios se celebren en xullo e canto antes, mellor, o que outorga máis posibilidades ao domingo día 12, primeiro domingo que entra no prazo legal de oficializar a convocatoria con 54 días de marxe. Este venres, tras o Consello da Xunta, Feijóo volveu evidenciar que a convocatoria é inminente e mostrouse proclive a secundar o PNV en algo máis: recortar a campaña á metade.
Tras a reunión semanal do Goberno galego, Feijóo foi cuestionado pola opinión expresada pola presidenta do PNV en Biskaia, Itxaso Atutxa, que dixo ver como boa idea reducir a campaña electoral á metade, ao xeito do que acontece no Estado cando cómpre repetir as eleccións xerais. O líder do PPdeG ve "absolutamente acertadas" esas "reflexións" e "compárteas ao cen por cen" cara a unha campaña na que, dende a súa condición de presidente do Goberno e non do partido, asegura que non vai poder incluír "actos masivos".
"Os tempos das campañas electorais clásicas xa pasaron, polo menos, durante os próximos dous anos", agrega, ademais de avanzar que a declaración de emerxencia sanitaria será "adaptada" para a celebración das eleccións, incluíndo medidas como a distancia entre persoas nas votacións. Así e todo, reflexiona, "do mesmo xeito que estamos acudindo ás terrazas, aos supermercados, ao traballo... Ir votar está dentro desa normalidade" á que a poboación está retornando "semana a semana".
Tras o Consello da Xunta, Feijóo cargou contra PSdeG, Galicia en Común e BNG por opoñerse á convocatoria en xullo e censurou especialmente a postura de Gonzalo Caballero, cuxas declaracións cualifica de "insulto" que di esperar que os socialistas vascos tomen "a broma"
Alén da cuestión da intendencia e de admitir que faltan poucos días para que revele a data exacta -para votar o 12X o límite para convocar os comicios é o vindeiro martes, día 19-, Feijóo reitera que a súa preferencia por ir xa ás urnas non é partidaria, senón sanitaria. "Non teño ningún interese en participar nunhas eleccións nesta situación", asegura, pero "non podo elixir" porque a alternativa do outono implicaría o risco de que, en caso de rebrote, "estaría nun suposto de ilegalidade e de presidente ilexítimo" se fose imposible celebrar as eleccións e houbese que ir alén de finais de setembro, cando finaliza a lexislatura.
Con este pano de fondo, Feijóo non aforrou críticas ás formacións da esquerda galega, que este venres reiteraban o seu rexeitamento á convocatoria "en plena pandemia". O líder do PPdeG carga con especial dureza contra Gonzalo Caballero, secretario xeral e candidato do PSdeG, cuxas declaracións ao respecto considera un "insulto" que espera que tomen "a broma" os socialistas vascos que, subliña, si apoian votar xa.
Dende o punto de vista de Feijóo, tanto o PSdeG como Galicia en Común e BNG non discordan con el, senón co "criterio dos expertos" consultados pola Xunta sobre a posibilidade de rebrotes e que indicaron "cal é o mes menos malo". "Estes tres partidos políticos van contra os seus propios actos" no Congreso dos Deputados, interpreta, toda vez que o PSOE e Unidas Podemos votaron a prol da prórroga do Estado de Alarma que incluíu a demanda do PNV e o BNG se abstivo.
