Milleiros de persoas secundan o chamamento do Foro Cidadán polo Ferrocarril
A mobilización polo tren digno en Ferrol, Eume e Ortegal apuntaba a histórica e foino. Milleiros de persoas -unhas 10.000, segundo o Concello, e en torno a 30.000, estimou a organización- tomaron este domingo as rúas da cidade departamental para entoar un berro tan unánime como histórico.
"Hoxe demostramos que toda a cidadanía, sen excepción, estamos unidas", resumiu o manifesto final ao que puxeron voz a directora de cinema Chelo Loureiro e o ex-baloncestista Miguel Loureiro no nome do Foro Cidadán polo Ferrocarril. O goberno local e o da Deputación e as principais forzas políticas e sociais, de entidades deportivas á Diocese, evidenciaron esa unidade.
Como veu sinalando o Foro nas últimas semanas, a reivindicación de melloras ferroviarias en Ferrolterra ten moitas vertentes. Destacan entre elas a modernización da ligazón coa Coruña, prometida hai unha década e que tiña este ano 2025 como obxectivo para que os tempos de viaxe non superasen os 40 minutos. Pero o certo é que non chegou e aínda por riba, subliñan, ao carácter obsoleto da infraestrutura vénse engadindo a redución de servizos por parte de Renfe. [Ferrolterra cansou de agardar polo tren e lanza un berro unánime contra a "marxinación"]
A recuperación de frecuencias e as melloras das liñas cara á Coruña e á Mariña, na cerna dunhas reivindicacións que claman por que o tren deixe de "obviar a mobilidade das nosas comarcas"
Máis frecuencias e mellores horarios, para comezar, pero continuar mellorando a liña á Coruña e cara ao Ortegal e A Mariña e seguir cun verdadeiro servizo de proximidade na contorna e en Galicia forman parte dunhas reivindicacións que piden, en definitiva, que o tren deixe de "obviar a mobilidade nas nosas comarcas". Que en Ferrolterra os trens deixen de ser poucos e se limiten a ollar cara ás conexións con Madrid.
O alcalde, José Manuel Rey (PP) e todos os grupos do Concello de Ferrol. Pero tamén o secretario xeral do PSdeG, José Ramón Gómez Besteiro; o presidente da Deputación, Valentín González Formoso; o deputado do BNG no Congreso, Néstor Rego, o parlamentario de Sumar Manuel Lago e múltiples representantes sociais secundaron a comitiva que puxo o foco en que as súas peticións son de "dereitos" e non de "privilexios".
