A empresa pública vén de actualizar as súas previsións de traballos con efectos sobre o tráfico e que requirirán cortes ou desvíos tanto de pasaxeiros como de mercadorías
Coa reforma integral da conexión ferroviaria Ourense-Monforte-Lugo aínda sen rematar logo de que os seus traballos veñan afectando á circulación de trens desde 2022, con sucesivos treitos pechados por completo e transbordos de pasaxeiros en autobús ou desvíos das mercadorías por outras liñas, Adif vén de actualizar as súas previsións de obras con efectos sobre o tráfico. Unhas estimacións a varios anos vista que aínda deben ser concretadas pero que xa avanzan restricións de maior ou menor intensidade tanto na conexión coa Meseta por obras no Padornelo ou na estación de Ourense como na rede interior galega, con actuacións nos túneles de entrada a Vigo, no Porriño, Ferrol ou na antiga liña de FEVE.
Adif ten a obriga de ofrecer ás empresas operadoras ferroviarias tanto de pasaxeiros como de mercadorías unha estimación das futuras "restricións de capacidade" da rede por actuacións que afecten ao tráfico durante máis de sete días e que dean lugar a cancelacións, desvío de trens ou substitución por outros modos de transporte de máis do 30% do tráfico estimado dunha liña. Esas estimacións vanse actualizando periodicamente, a última vez este 7 de novembro.
Liña coa Meseta
Na liña coa Meseta, á espera do desdobramento da actual vía única de alta velocidade entre Medina del Campo e Zamora, cuxos traballos están sendo contratados nas últimas semanas, Adif ten pendente a mellora doutro funil, o do Padornelo.
Mentres no resto da liña construíronse túneles para dúas vías paralelas, no Padornelo púxose en servizo hai catro anos un único novo túnel para unha soa vía de alta velocidade, paralelo ao preexistente túnel da vía convencional. A mellora e adaptación para a alta velocidade dese túnel previo do Padornelo está aínda pendente e Adif prevé agora o comezo dos seus traballos en 2027, cunha duración de varios anos e con corte total do tráfico aínda pendente de concretar.
Tamén afectarán ao tráfico as obras da nova estación de Ourense, que inclúen tanto actuacións na praia de vías como sobre elas que obrigarán tanto a cortes totais do tráfico como a restricións de velocidade. Neste caso os cortes están previstos en principio, e pendentes de concretarse, cara a finais de 2027.
Contorna de Vigo
Na contorna de Vigo Adif di que coordinará as obras de renovación das liñas Guixar-Redondela, Redondela-Arcade, Redondela-Guillarei e de supresión nesa última do paso a nivel do Porriño
Na contorna de Vigo, ás obras de renovación xa en marcha da liña Guixar-Redondela sumaranse nos próximos meses traballos similares que tamén requirirán cortes do tráfico nas liñas convencionais Redondela-Arcade e Redondela-Guillarei. Nese último caso Adif avanza que coordinará as obras coa supresión do conflitivo paso a nivel do centro do Porriño, o que suporá o corte total durante varios meses dunha liña con especial relevancia para as mercadorías.
Tamén en Vigo Adif prevé acometer traballos de impermeabilización dos dous túneles paralelos das Maceiras de máis de 8 quilómetros de acceso á cidade a alta velocidade desde Redondela, que entraron en servizo hai dez anos. Nese caso as obras realizaranse nun ou noutro túnel de xeito alterno con desvío dos trens ao que siga en funcionamento.
Resto de Galicia
No resto de Galicia Adif prevé tamén efectos sobre o tráfico en Ferrol, tanto pola renovación do ramal de mercadorías ao seu porto como por actuacións na liña de ancho métrico a Ribadeo, a antiga Feve. No caso desa liña de ancho métrico a progresiva mellora dos seus sistemas de seguridade tamén obrigarán a cortes puntuais do tráfico entre Ortigueira e Ribadeo.
Todas estas previsións de restricións de capacidade das redes de Adif e Adif Alta Velocidade aínda poden ser mudadas e concretadas en futuras actualizacións, pero xa avanzan uns próximos anos de circulacións condicionadas pola mellora das infraestruturas.
